ബിഹാറിലെ സാധാരണ തെരുവുകളിൽനിന്ന് ഇന്ത്യൻ ക്രിക്കറ്റിന്റെ നെറുകയിലേക്കുള്ള വൈഭവ് സൂര്യവംശിയുടെ വളർച്ച തികച്ചും അവിശ്വസനീയമാണ്. കളിപ്പാട്ടങ്ങളുമായി ചങ്ങാത്തം കൂടേണ്ട പ്രായത്തിൽ ക്രിക്കറ്റ് ബാറ്റ് കൈയ്യിലെടുത്ത വൈഭവ്, തന്റെ അസാധാരണമായ പ്രതിഭ കൊണ്ട് വളരെ വേഗത്തിലാണ് പ്രൊഫഷണൽ ക്രിക്കറ്റിലേക്ക് നടന്നുകയറിയത്. 12-ാം വയസ്സിൽ ബിഹാറിനുവേണ്ടി രഞ്ജി ട്രോഫിയിൽ അരങ്ങേറ്റം കുറിച്ചുകൊണ്ടാണ് ഈ കുട്ടിത്താരം ആദ്യമായി രാജ്യത്തിന്റെ ശ്രദ്ധ പിടിച്ചുപറ്റുന്നത്. ഫസ്റ്റ് ക്ലാസ് ക്രിക്കറ്റ് ചരിത്രത്തിൽ ബിഹാറിനായി കളിക്കുന്ന ഏറ്റവും പ്രായം കുറഞ്ഞ രണ്ടാമത്തെ താരം എന്ന റെക്കോർഡ് കുറിച്ചായിരുന്നു വൈഭവിന്റെ തുടക്കം.
ഐപിഎല്ലിലെ 20 ഓവർ ഫോർമാറ്റിൽ നിന്ന് 50 ഓവർ ക്രിക്കറ്റിലേക്ക് പെട്ടെന്ന് മാറുമ്പോൾ താരം എങ്ങനെ ഇന്നിങ്സ് കെട്ടിപ്പടുക്കുമെന്നാണ് സെലക്ടർമാർ ഉറ്റുനോക്കുന്നത്
തുടർന്ന് അണ്ടർ-19 ക്രിക്കറ്റിലും ആഭ്യന്തര മത്സരങ്ങളിലും റൺസ് അടിച്ചുകൂട്ടി വൈഭവ് വാർത്തകളിൽ നിറഞ്ഞു. 13-ാം വയസ്സിൽ ഓസ്ട്രേലിയ അണ്ടർ-19 ടീമിനെതിരെയുള്ള യൂത്ത് ടെസ്റ്റിൽ 58 പന്തിൽനിന്ന് സെഞ്ച്വറി നേടി വൈഭവ് ഇന്ത്യൻ ക്രിക്കറ്റിലെ അടുത്ത വലിയ വാഗ്ദാനമാണെന്ന് തെളിയിച്ചു. വിജയ് ഹസാരെ ട്രോഫിയിലൂടെ പ്രായം കുറഞ്ഞ ലിസ്റ്റ് എ ക്രിക്കറ്റ് താരമായി മാറിയ വൈഭവ്, അരുണാചൽ പ്രദേശിനെതിരെ 36 പന്തിൽ സെഞ്ച്വറി നേടിക്കൊണ്ട് സ്ഫോടനാത്മകമായ ബാറ്റിങ് ശൈലി ലോകത്തിന് മുന്നിൽ തുറന്നുകാട്ടി. ഈ അസാധാരണ തുടക്കമാണ് 14-ാം വയസ്സിൽ രാജസ്ഥാൻ റോയൽസിലൂടെയുള്ള ഐപിഎൽ അരങ്ങേറ്റത്തിലേക്കും ഇപ്പോൾ 15-ാം വയസ്സിൽ സച്ചിൻ ടെണ്ടുൽക്കറുടെ 36 വർഷം പഴക്കമുള്ള റെക്കോർഡ് തകർത്തുകൊണ്ടുള്ള ഇന്ത്യൻ സീനിയർ ടീമിലേക്കുള്ള വിളിയിലേക്കും വൈഭവിനെ എത്തിച്ചത്.
എന്നാൽ, ഈ ചരിത്ര നേട്ടത്തിന്റെ ആവേശം അടങ്ങും മുൻപ് തന്നെ ഈ കൗമാര പ്രതിഭയെ കാത്തിരിക്കുന്നത് വിശ്രമമില്ലാത്ത, കഠിനമായ മത്സരക്രമങ്ങളാണ്. ജൂൺ മുതൽ ഏഷ്യൻ ഗെയിംസ് വരെ നീളുന്ന വലിയൊരു അന്താരാഷ്ട്ര ക്രിക്കറ്റ് സീസണാണ് വൈഭവിനായി കാത്തിരിക്കുന്നത്.
ദേശീയ സീനിയർ ടീമിലേക്ക് തിരഞ്ഞെടുക്കപ്പെട്ടെങ്കിലും വൈഭവിന്റെ കളി തുടങ്ങുന്നത് ഇന്ത്യ 'എ' ടീമിനൊപ്പമാണ്. ജൂൺ 9 മുതൽ 21 വരെ ശ്രീലങ്കയിലെ ദംബുള്ളയിൽ നടക്കുന്ന ഏകദിന ത്രിരാഷ്ട്ര പരമ്പരയിലാണ് താരം ആദ്യം പാഡണിയുക. അഫ്ഗാനിസ്ഥാൻ 'എ', ശ്രീലങ്ക 'എ' ടീമുകൾക്കെതിരെയുള്ള ഈ മത്സരങ്ങൾ സീനിയർ തലത്തിലെ കളിരീതികളുമായി പൊരുത്തപ്പെടാൻ വൈഭവിന് മികച്ചൊരു പരീക്ഷണശാലയായി മാറും. ഐപിഎല്ലിലെ 20 ഓവർ ഫോർമാറ്റിൽ നിന്ന് 50 ഓവർ ക്രിക്കറ്റിലേക്ക് പെട്ടെന്ന് മാറുമ്പോൾ താരം എങ്ങനെ ഇന്നിങ്സ് കെട്ടിപ്പടുക്കുമെന്നാണ് സെലക്ടർമാർ ഉറ്റുനോക്കുന്നത്.
ശ്രീലങ്കൻ പര്യടനത്തിന് തൊട്ടുപിന്നാലെ വൈഭവ് ഇന്ത്യൻ സീനിയർ ജേഴ്സിയിൽ അരങ്ങേറ്റം കുറിക്കും. ജൂൺ 26, 28 തീയതികളിൽ അയർലൻഡിനെതിരെ നടക്കുന്ന രണ്ട് ടി20 മത്സരങ്ങളാവും ലോക ക്രിക്കറ്റിലെ തന്നെ ഏറ്റവും ശ്രദ്ധേയമായ അധ്യായത്തിന്റെ തുടക്കം. ഈ മത്സരത്തിൽ ക്രീസിലിറങ്ങുന്നതോടെ, ഇന്ത്യൻ ക്രിക്കറ്റ് ചരിത്രത്തിൽ അന്താരാഷ്ട്ര മത്സരം കളിക്കുന്ന ഏറ്റവും പ്രായം കുറഞ്ഞ താരം എന്ന റെക്കോർഡ് ഔദ്യോഗികമായി വൈഭവിന്റെ പേരിൽ കുറിക്കപ്പെടും.
അയർലൻഡ് പര്യടനം കഴിഞ്ഞയുടൻ ഇന്ത്യൻ ടീം പറക്കുന്നത് ഇംഗ്ലണ്ടിലേക്കാണ്. കരിയറിൽ ഇന്നേവരെ നേരിട്ടിട്ടില്ലാത്ത ഇംഗ്ലീഷ് സാഹചര്യങ്ങളിലെ സ്വിങ്ങും പേസും നേരിടുകയെന്നത് ഈ പതിനഞ്ചുകാരന് വലിയൊരു വെല്ലുവിളിയാകും. അതിനുശേഷം ചൈനയിൽ നടക്കുന്ന 2026 ഏഷ്യൻ ഗെയിംസിനുള്ള 15 അംഗ ഇന്ത്യൻ ടീമിലും വൈഭവ് ഇടംപിടിച്ചിട്ടുണ്ട്. ശ്രേയസ് അയ്യരുടെ ക്യാപ്റ്റൻസിയിൽ ഇന്ത്യക്കായി സ്വർണം നേടുകയെന്ന വലിയ ദൗത്യമാണ് ഏഷ്യൻ ഗെയിംസിൽ വൈഭവിനെ കാത്തിരിക്കുന്നത്.
അജിത് അഗാർക്കറുടെ നേതൃത്വത്തിലുള്ള സെലക്ഷൻ കമ്മിറ്റി മുംബൈയിൽ യോഗം ചേർന്നാണ് പ്രതിഭ മാത്രം മാനദണ്ഡമാക്കി വൈഭവിനെ ടീമിലെടുത്തത്. സച്ചിൻ ടെണ്ടുൽക്കറെപ്പോലെ വളരെ ചെറിയ പ്രായത്തിൽ തന്നെ രാജ്യത്തിന്റെ പ്രതീക്ഷയുടെ ഭാരവുമായി കളത്തിൽ ഇറങ്ങുമ്പോൾ വൈഭവ് അതെങ്ങനെ കൈകാര്യം ചെയ്യുമെന്നറിയാനുള്ള ആകാംക്ഷയിലാണ് ക്രിക്കറ്റ് ലോകം. സച്ചിൻ സ്ഥാപിച്ച റൺവേട്ടയുടെ ഹിമാലയൻ റെക്കോർഡുകളിലേക്ക് എത്താൻ വൈഭവിന് ഇനിയും ഒരുപാട് ദൂരം സഞ്ചരിക്കേണ്ടതുണ്ട്.
കുട്ടിക്കളിയുടെ പ്രായത്തിൽ ലോകത്തിലെ ഏറ്റവും മികച്ച ബൗളർമാരെ നേരിടാൻ പോകുന്ന വൈഭവ് സൂര്യവംശി, വരാനിരിക്കുന്ന ഈ തിരക്കേറിയ അന്താരാഷ്ട്ര മത്സരങ്ങളിലൂടെ ഇന്ത്യൻ ക്രിക്കറ്റിന്റെ ഭാവി രാജാവായി മാറുമെന്നാണ് ആരാധകരും ക്രിക്കറ്റ് ലോകവും ഒരേപോലെ വിശ്വസിക്കുന്നത്.
English Summary: From the ordinary streets of Bihar to the pinnacle of Indian cricket, the rise of Vaibhav Suryavanshi has been nothing short of remarkable. Picking up a cricket bat at an age when most children play with toys, Vaibhav quickly showcased extraordinary talent and progressed rapidly into professional cricket. He first grabbed national attention by making his Ranji Trophy debut for Bihar at just 12 years old. With that achievement, he became the second-youngest player ever to represent Bihar in First-Class cricket, marking the beginning of an inspiring cricketing journey.