ഇത്തവണത്തെ ലോകകപ്പ് വെറുമൊരു കിരീടപ്പോരാട്ടമല്ല; മറിച്ച് ഫുട്ബോള് ലോകത്തെ എക്കാലത്തെയും മികച്ച രണ്ട് ഇതിഹാസങ്ങളുടെ കരിയര് നിര്ണയിക്കുന്ന അവസാന പോരാട്ടങ്ങളും, ആധുനിക ഫുട്ബോളിലെ രണ്ട് വന്ശക്തികളുടെ സിംഹാസനവേട്ടയും ഒത്തുചേരുന്ന അപൂര്വ്വ വേദിയാണ്. അതുകൊണ്ട് തന്നെ അര്ജന്റീനയുടെ ലിയോണല് മെസി, പോര്ച്ചുഗലിന്റെ ക്രിസ്റ്റ്യാനോ റൊണാള്ഡോ, നോര്വേയുടെ എര്ലിങ് ഹാലണ്ട്, സ്പെയിന്റെ ലാമിന് യമാല് എന്നീ നാല് സൂപ്പര് താരങ്ങളുടെ ലക്ഷ്യങ്ങളുമാണ് ഫാന്സ് ലോകം ഉറ്റുനോക്കുന്നത്,
ഇതിഹാസങ്ങളുടെ അവസാന പോരാട്ടം
ലോകകപ്പ് ചരിത്രത്തില് ഏറ്റവും കൂടുതല് മത്സരങ്ങള് (26 മത്സരങ്ങള്) കളിച്ച താരമെന്ന റെക്കോര്ഡുമായാണ് മുപ്പത്തിയെട്ടുകാരനായ ലിയോണല് മെസി അര്ജന്റീനന് ജേഴ്സിയില് തന്റെ ആറാം ലോകകപ്പിന് ബൂട്ട് കെട്ടുന്നത്. 2022ല് ഖത്തറിന്റെ മണ്ണില് കരിയറിലെ ഏറ്റവും വലിയ സ്വപ്നം സാക്ഷാത്കരിച്ച മെസിയുടെ ഇത്തവണത്തെ പ്രധാന ലക്ഷ്യം വിശ്വകിരീടം നിലനിര്ത്തുക എന്നതുതന്നെയാണ്. 38ാം വയസ്സിലും ഇന്റര് മയാമിയിലും ദേശീയ ടീമിലും മികച്ച ഫോം തുടരുന്ന മെസിക്ക്, ഈ ടൂര്ണമെന്റ് തന്റെ അന്താരാഷ്ട്ര കരിയറിന് സുവര്ണ്ണ ലിപികളില് പൂര്ണ്ണവിരാമമിടാനുള്ള വേദിയാണ്. ഒപ്റ്റാ സൂപ്പര് കമ്പ്യൂട്ടര് പ്രവചനപ്രകാരം നിലവിലെ ചാമ്പ്യന്മാരായ അര്ജന്റീനയ്ക്ക് 10.28% കിരീട സാധ്യതയുണ്ട്. കളി മെനയുന്നതിലും അസിസ്റ്റുകള് നല്കുന്നതിലും ഇപ്പോഴും ലോകത്തിലെ ഏറ്റവും മികച്ച താരം താന് തന്നെയെന്ന് തെളിയിക്കുകയാണ് മെസിയുടെ ലക്ഷ്യം.
മറുഭാഗത്ത്, ഫുട്ബോള് ലോകത്തെ ഏറ്റവും വലിയ അത്ഭുതമായി തന്റെ 41ാം വയസ്സിലും ക്രിസ്റ്റ്യാനോ റൊണാള്ഡോ പോര്ച്ചുഗലിന്റെ മുന്നേറ്റനിരയെ നയിക്കാന് എത്തുന്നു. അന്താരാഷ്ട്ര ഫുട്ബോളിലെ എക്കാലത്തെയും ഉയര്ന്ന ഗോള്വേട്ടക്കാരനായ റൊണാള്ഡോയുടെ കരിയറിലെ ഒരേയൊരു കുറവ് ഒരു ലോകകപ്പ് കിരീടമില്ല എന്നതാണ്. റോബര്ട്ടോ മാര്ട്ടിനെസിന്റെ കീഴില് അതിശക്തമായ സ്ക്വാഡ് ഡെപ്തുള്ള (6.92% കിരീട സാധ്യത) പോര്ച്ചുഗല് ടീം റൊണാള്ഡോയ്ക്ക് മികച്ച പിന്തുണ നല്കാന് പ്രാപ്തമാണ്. കരിയറിന്റെ അവസാന ഘട്ടത്തിലും തന്റെ അത്ഭുതകരമായ ശാരീരികക്ഷമത കൊണ്ട് ലോകത്തെ ഞെട്ടിക്കുന്ന സിആര്7 , നോക്കൗട്ട് മത്സരങ്ങളില് തന്റെ തനത് ഫോമിലേക്ക് ഉയര്ന്നാല് പോര്ച്ചുഗലിന് അത് ആദ്യ ലോകകപ്പ് കിരീടമെന്ന ചരിത്ര നിമിഷമാകും.
യുവരക്തങ്ങളുടെ സിംഹാസനവേട്ട
മാഞ്ചസ്റ്റര് സിറ്റിയുടെ ഗോള് മെഷീനായ ഇരുപത്തിയഞ്ചുകാരന് എര്ലിങ് ഹാലണ്ടിന് ഇത് വെറുമൊരു ടൂര്ണമെന്റല്ല, മറിച്ച് ലോക ഫുട്ബോളിലെ സിംഹാസനത്തിലേക്കുള്ള നേരിട്ടുള്ള പ്രവേശനമാണ്. നീണ്ട 28 വര്ഷത്തെ കാത്തിരിപ്പിന് ശേഷമാണ് നോര്വേ ലോകകപ്പിന് യോഗ്യത നേടുന്നത്. ലോകകപ്പ് യോഗ്യതാ റൗണ്ടില് വെറും 8 മത്സരങ്ങളില് നിന്ന് 16 ഗോളുകള് അടിച്ചുകൂട്ടി ടോപ്പ് സ്കോററായ ഹാലണ്ടിന്റെ കന്നി ലോകകപ്പ് അധിനിവേശത്തിനാണ് വടക്കേ അമേരിക്ക സാക്ഷ്യം വഹിക്കാന് പോകുന്നത്. ക്ലിനിക്കല് ഫിനിഷിങ്ങില് ലോകത്തില് നിലവില് ഹാലണ്ടിനൊപ്പം നില്ക്കാന് മറ്റൊരു സ്െ്രെടക്കറില്ലാത്തതിനാല്, നോര്വേയുടെ മുന്നേറ്റം ഹാലണ്ടിന്റെ ബൂട്ടിനെ ആശ്രയിച്ചിരിക്കും.
യൂറോ കപ്പിലെ തകര്പ്പന് പ്രകടനത്തിന് ശേഷം, ലോകകപ്പിന്റെ വലിയ വേദിയിലേക്ക് തന്റെ പതിനെട്ടാം വയസ്സില് ലാമിന് യമാല് എത്തുമ്പോള് ഫുട്ബോള് ലോകം കാണുന്നത് ഒരു പുതിയ പെലെയെയാണ്. ഒപ്റ്റാ പ്രവചനത്തില് ഏറ്റവും മുന്നിലുള്ള (15.43% സാധ്യത) സ്പെയിന് ടീമിന്റെ പ്രധാന ആയുധം ബാഴ്സലോണയുടെ ഈ വിങ്ങര് തന്നെയാണ്. യൂറോപ്യന് ചാമ്പ്യന്ഷിപ്പിലെ മികച്ച യുവതാരമായി തിരഞ്ഞെടുക്കപ്പെട്ട യമാല്, മെസിയുടെയും റൊണാള്ഡോയുടെയും യുഗം അവസാനിക്കുമ്പോള് ലോക ഫുട്ബോള് ഇനി തന്റെ കൈകളിലാണെന്ന് പ്രഖ്യാപിക്കാനും പുതിയ യുഗത്തിന്റെ രാജാവാകാനുമാണ് വരുന്നത്.
ആര് ചിരിക്കും?
48 ടീമുകളുടെയും 104 മത്സരങ്ങളുടെയും അതികഠിനമായ ഈ ലോകകപ്പ് ഘടനയില് വ്യക്തിഗത മികവ് കൊണ്ട് മാത്രം ഒരു കളിക്കാരനും ഒറ്റയ്ക്ക് കപ്പടിക്കാന് കഴിയില്ല. എന്നാല് ക്വാര്ട്ടര് ഫൈനല് മുതലുള്ള നിര്ണായക നോക്കൗട്ട് മത്സരങ്ങളില് കളി തിരിക്കുക ഈ സൂപ്പര് താരങ്ങളുടെ സാന്നിധ്യം തന്നെയായിരിക്കും.
നിലവിലെ സാഹചര്യങ്ങളും ടീം ബാലന്സും പരിശോധിക്കുമ്പോള്, യുവത്വവും അനുഭവസമ്പത്തും ഒരുപോലെ ഒത്തിണങ്ങിയ ലാമിന് യമാലിന്റെ സ്പെയിനും ലിയോണല് മെസിയുടെ അര്ജന്റീനയുമാണ് ഫൈനല് ഘട്ടത്തിലേക്ക് മുന്നേറാന് ഏറ്റവും കൂടുതല് സാധ്യത കല്പ്പിക്കപ്പെടുന്നത്. 41ാം വയസ്സില് റൊണാള്ഡോയുടെ പോര്ച്ചുഗല് കടുത്ത പോരാട്ടം കാഴ്ചവെക്കുമെങ്കിലും ബെഞ്ച് കരുത്ത് ഇവിടെ വില്ലനായേക്കാം. ഹാലണ്ടിന്റെ നോര്വേ കറുത്ത കുതിരകളായേക്കാമെങ്കിലും വന്ശക്തികള്ക്കെതിരെ ടീം ഡെപ്തിന്റെ കുറവ് അവര്ക്ക് തിരിച്ചടിയാകും.അതായത് പഴയ തലമുറയുടെ അവസാന പോരാട്ട വീര്യവും പുതിയ തലമുറയുടെ അധിനിവേശവും നേര്ക്കുനേര് വരുന്ന ഈ ലോകകപ്പില്, മികച്ച കോച്ചിങ് തന്ത്രങ്ങളും സ്ക്വാഡ് ഡെപ്തുമുള്ള ഒരു ടീമിന്റെ ഭാഗമായി നില്ക്കുന്ന സൂപ്പര് താരമായിരിക്കും ജൂലൈ 19ന് ന്യൂജേഴ്സിയിലെ മെറ്റ്ലൈഫ് സ്റ്റേഡിയത്തില് ലോകകിരീടം ഉയര്ത്തുക. അവിടെ യമാലിനും സ്പെയിനുമാണ് ഡാറ്റാ പ്രകാരം നേരിയ മുന്തൂക്കം.
English Summary: The upcoming FIFA World Cup is more than just a battle for the trophy. It represents a defining moment for some of football's greatest stars and the pursuit of global supremacy by major footballing nations. Fans around the world are closely watching four iconic players with unique ambitions: Argentina's Lionel Messi, Portugal's Cristiano Ronaldo, Norway's Erling Haaland, and Spain's Lamine Yamal. For Messi and Ronaldo, the tournament could mark the final chapter of their legendary international careers, while Haaland and Yamal aim to establish themselves as the new faces of world football. The World Cup is set to be a historic stage where generations collide and football history is rewritten.