ബാഷ 2’, ‘പേട്ട 2’ വേണ്ടെന്ന് വെച്ചു; ‘ജയിലർ 2’ സ്വീകരിച്ചതിന് കാരണമുണ്ട്: രജിനികാന്ത്

സൂപ്പർഹിറ്റ് ചിത്രങ്ങളുടെ രണ്ടാം ഭാഗങ്ങളിൽ അഭിനയിക്കാൻ താൽപര്യമില്ലാത്ത നടനാണ് രജിനികാന്ത്. അതുകൊണ്ടുതന്നെ ‘ബാഷ’, ‘പേട്ട ’ എന്നീ ചിത്രങ്ങളുടെ തുടർഭാഗങ്ങൾ അദ്ദേഹം നിരസിച്ചത് ആരാധകരിൽ കൗതുകമുണ്ടാക്കിയിരുന്നു. എന്നാൽ ‘ജയിലർ 2’യുടെ കാര്യത്തിൽ താരം നിലപാട് മാറ്റി. എന്തുകൊണ്ടാണ് ഈ ചിത്രത്തിന് സമ്മതം മൂളിയതെന്ന് വെളിപ്പെടുത്തിയിരിക്കുകയാണ് രജിനികാന്ത്.

‘ജയിലർ 2’യുടെ റിലീസിന് മുന്നോടിയായി സൺ നെക്സ്റ്റിലൂടെ സംപ്രേഷണം ചെയ്ത ‘ജയിലർ 2 സൂപ്പർ ഷോ’ എന്ന പരിപാടിയിലാണ് താരം ഇക്കാര്യം വ്യക്തമാക്കിയത്. വിജയിച്ച ഒരു സിനിമയുടെ കഥ വീണ്ടും ആവർത്തിക്കുന്ന രീതിയിലുള്ള തുടർചിത്രങ്ങളോട് തനിക്ക് വലിയ താൽപര്യമില്ലെന്നാണ് രജനീകാന്ത് പറഞ്ഞത്. ആദ്യ ഭാഗത്തിലെ വിജയഘടകങ്ങൾക്കൊപ്പം കുറച്ച് പുതിയ കാര്യങ്ങൾ ചേർത്ത് മറ്റൊരു സിനിമയാക്കുന്നതിനോട് താൽപര്യമില്ലെന്നും അദ്ദേഹം വ്യക്തമാക്കി.

രജിനികാന്ത് കരിയറിലെ ഏറ്റവും ശ്രദ്ധേയമായ ചിത്രങ്ങളിലൊന്നാണ് ‘ബാഷ’. ചിത്രത്തിന്റെ രണ്ടാം ഭാഗം ഒരുക്കുന്നതിനായി സത്യ മൂവീസ് പലതവണ തന്നെ സമീപിച്ചിരുന്നതായി താരം വെളിപ്പെടുത്തി. അന്തരിച്ച നിർമാതാവ് ആർ.എം. വീരപ്പൻ മുന്നോട്ടുവെച്ച ആശയത്തിൽ, മുൻകാലത്തെ ഗുണ്ടാസംഘജീവിതം ഉപേക്ഷിച്ച് ഒളിവിൽ കഴിയുന്ന മാനിക്കത്തിന്റെ ജീവിതത്തിലേക്ക് പഴയകാലം വീണ്ടും കടന്നുവരുന്നതായിരുന്നു പ്രമേയം. എന്നാൽ ഈ കഥയുമായി മുന്നോട്ടുപോകാൻ രജനീകാന്തിന് താൽപര്യമുണ്ടായിരുന്നില്ല.

കാർത്തിക് സുബ്ബരാജും ‘പേട്ട 2’ എന്ന ആശയവുമായി രജിനികാന്തിനെ സമീപിച്ചിരുന്നു. ആദ്യ ചിത്രത്തിൽ വിജയ് സേതുപതി അവതരിപ്പിച്ച കഥാപാത്രത്തിന്റെ കഥ തുടരുന്ന രീതിയിലായിരുന്നു ആലോചന. എന്നാൽ ആ പ്രമേയവും താരത്തെ ആകർഷിച്ചില്ല. രണ്ട് ചിത്രങ്ങളുടെയും തുടർഭാഗങ്ങൾ വേണ്ടെന്നുവെക്കുകയായിരുന്നു അദ്ദേഹം.

നെൽസൺ ദിലീപ്കുമാർ സംവിധാനം ചെയ്ത ‘ജയിലർ’ ഒ.ടി.ടി.യിൽ എത്തിയശേഷം വീണ്ടും കണ്ടപ്പോഴാണ് രണ്ടാം ഭാഗത്തെക്കുറിച്ച് രജിനികാന്ത് ചിന്തിച്ചത്. ആദ്യ ചിത്രത്തിന്റെ അവസാനത്തോടടുത്തുള്ള രംഗങ്ങളാണ് അദ്ദേഹത്തിന് പുതിയ കഥയ്ക്കുള്ള സാധ്യത നൽകിയത്.

വർമനെ കൊല്ലാൻ ഒരുങ്ങുന്ന സമയത്ത്, തനിക്ക് പിന്നിൽ വലിയൊരു ശൃംഖലയുണ്ടെന്നും അവർ തന്നെ വെറുതെ വിടില്ലെന്നും വർമ മുന്നറിയിപ്പ് നൽകുന്നുണ്ട്. കൂടാതെ, ആയിരം കോടി രൂപയുടെ ചരക്കുകളുമായി ബന്ധപ്പെട്ട മൂന്ന് കണ്ടെയ്‌നറുകളും ചിത്രത്തിലുണ്ട്. ഈ രണ്ട് ഘടകങ്ങളും തുടർഭാഗത്തിൽ വികസിപ്പിക്കാവുന്ന വലിയൊരു കഥയിലേക്ക് വിരൽചൂണ്ടുന്നതായി രജനീകാന്തിന് തോന്നി. ആദ്യ ചിത്രത്തിൽ തന്നെ തുടർകഥയ്ക്കുള്ള അടിത്തറയുണ്ടായിരുന്നുവെന്നും അതിനെ കൂടുതൽ വികസിപ്പിക്കാമെന്നുമുള്ള തിരിച്ചറിവാണ് ‘ജയിലർ 2’ സ്വീകരിക്കാൻ താരത്തെ പ്രേരിപ്പിച്ചത്.

രണ്ടാം ഭാഗത്തിനുള്ള ആശയം രജിനികാന്ത് സംവിധായകൻ നെൽസൺ ദിലീപ്കുമാറുമായി പങ്കുവെച്ചെങ്കിലും തുടക്കത്തിൽ അദ്ദേഹത്തിന് വലിയ താൽപര്യമുണ്ടായിരുന്നില്ല. ആദ്യ ചിത്രത്തിൽനിന്ന് പരമാവധി കാര്യങ്ങൾ ഇതിനകം പുറത്തെടുത്തുകഴിഞ്ഞുവെന്നായിരുന്നു നെൽസന്റെ ആദ്യ നിലപാട്. എന്നാൽ ഏകദേശം ഒരു മാസത്തെ ആലോചനയ്ക്കുശേഷം കൂടുതൽ വികസിപ്പിച്ച ആശയവുമായി അദ്ദേഹം തിരിച്ചെത്തി. തുടർന്ന് തിരക്കഥയുടെ പണികൾ പുരോഗമിച്ചു. രജിനികാന്ത് ‘വേട്ടയ്യൻ’, ‘ലാൽ സലാം’, ‘കൂലി’ എന്നീ ചിത്രങ്ങളുമായി ബന്ധപ്പെട്ട തിരക്കുകളിലായിരുന്ന സമയത്താണ് നെൽസൺ ‘ജയിലർ 2’യുടെ രചനയിൽ ശ്രദ്ധ കേന്ദ്രീകരിച്ചത്. ഇതിനായി സംവിധായകൻ തന്റെ തെലുങ്ക് ചിത്രവുമായി ബന്ധപ്പെട്ട പ്രതിബദ്ധതയും മാറ്റിവെച്ചതായി റിപ്പോർട്ടുണ്ട്.

ടൈഗർ മുത്തുവേൽ പാണ്ഡ്യനായി രജിനികാന്ത് വീണ്ടും എത്തുന്ന ചിത്രത്തിൽ രമ്യ കൃഷ്ണൻ, യോഗി ബാബു, മിർണ എന്നിവർ ആദ്യ ഭാഗത്തിൽനിന്ന് തിരിച്ചെത്തുന്നുണ്ട്. എസ്.ജെ. സൂര്യ, മിഥുൻ ചക്രവർത്തി, വിദ്യാ ബാലൻ, സുരാജ് വെഞ്ഞാറമൂട്, അന്ന രാജൻ, ജതിൻ സർന എന്നിവരാണ് പുതിയതായി ചിത്രത്തിലെത്തുന്നവർ. മോഹൻലാൽ, ശിവരാജ്കുമാർ, ജാക്കി ഷ്രോഫ്, വിജയ് സേതുപതി എന്നിവരുടെ അതിഥിവേഷങ്ങളും ചിത്രത്തിലുണ്ടാകുമെന്നാണ് റിപ്പോർട്ടുകൾ.

അനിരുദ്ധ് രവിചന്ദറാണ് സംഗീതം ഒരുക്കുന്നത്. 2023-ൽ പുറത്തിറങ്ങിയ ആദ്യ ‘ജയിലർ’ ആഗോള ബോക്സ് ഓഫീസിൽ 604.50 കോടി രൂപ നേടിയെന്നാണ് റിപ്പോർട്ട്. ഏകദേശം 200 കോടി രൂപയായിരുന്നു ചിത്രത്തിന്റെ നിർമാണച്ചെലവ്. രണ്ടാം ഭാഗത്തിന്റെ ബജറ്റ് 250 മുതൽ 350 കോടി രൂപ വരെയാണെന്നാണ് സൂചന.

ഒക്ടോബർ 15-ന് തിയറ്ററുകളിലെത്താൻ നിശ്ചയിച്ചിരിക്കുന്ന ‘ജയിലർ 2’ ആദ്യ ഭാഗത്തിന്റെ വിജയത്തെ മറികടക്കുമോ എന്നത് കാത്തിരുന്ന് കാണണം. എന്നാൽ മറ്റ് ചിത്രങ്ങളുടെ തുടർഭാഗങ്ങൾ നിരസിച്ച രജിനികാന്തിനെ ഈ സിനിമയിലേക്ക് തിരിച്ചെത്തിച്ചത് വെറുമൊരു വിജയത്തിന്റെ ആവർത്തനമല്ല, ആദ്യ ഭാഗത്തിൽത്തന്നെ ഒളിഞ്ഞുകിടന്ന മറ്റൊരു കഥയുടെ സാധ്യതയാണെന്നത് ശ്രദ്ധേയമാണ്.