ഭൂമി നാളെയൊരു വലിയ തീപ്പന്തമായി മാറാതിരിക്കാൻ മനുഷ്യൻ ആശ്രയിക്കുന്ന ഏറ്റവും വലിയ പ്രതിരോധ കോട്ട ഏതാണെന്ന് ചോദിച്ചാൽ ഒറ്റ ഉത്തരമേയുള്ളൂ—നമ്മുടെ കാടുകൾ. നമ്മൾ വണ്ടിയോടിച്ചും ഫാക്ടറികൾ പ്രവർത്തിപ്പിച്ചും അന്തരീക്ഷത്തിലേക്ക് തള്ളിവിടുന്ന പുക (കാർബൺ ഡൈ ഓക്സൈഡ്) ഈ പച്ചപ്പുകൾ വലിച്ചെടുക്കും എന്നതായിരുന്നു നമ്മുടെ ഏക ആശ്വാസം. എന്നാൽ, ആഗോള താപനത്തിനെതിരെയുള്ള പോരാട്ടത്തിൽ കാടുകളെ മാത്രം വിശ്വസിച്ച് ഇനി മുന്നോട്ടുപോകാനാകില്ലെന്ന ഞെട്ടിക്കുന്ന മുന്നറിയിപ്പാണ് പുതിയ ശാസ്ത്രീയ പഠനങ്ങൾ നൽകുന്നത്. നമ്മൾ വിചാരിച്ചത്ര കാർബൺ സംഭരിക്കാൻ ഒരുപക്ഷേ ഇനി മരങ്ങൾക്ക് കഴിഞ്ഞെന്ന് വരില്ല!
ഇതുവരെ ശാസ്ത്രലോകം കരുതിയിരുന്നത് മരങ്ങൾ കൂടുതൽ പ്രകാശസംശ്ലേഷണം (Photosynthesis) നടത്തിയാൽ, അവ കൂടുതൽ കാർബൺ വലിച്ചെടുക്കുകയും വേഗത്തിൽ വളരുകയും ചെയ്യുമെന്നാണ്. എന്നാൽ കൊളംബിയ യൂണിവേഴ്സിറ്റിയിലെ ശാസ്ത്രജ്ഞനായ മുകുന്ദ് പലത് റാവുവിന്റെ നേതൃത്വത്തിൽ അമേരിക്കയിലെ 137 കേന്ദ്രങ്ങളിൽ നടത്തിയ പഠനം ഈ ധാരണയെ തിരുത്തിക്കുറിക്കുന്നു.
മരങ്ങൾ അന്തരീക്ഷത്തിൽനിന്ന് കാർബൺ വലിച്ചെടുക്കുന്നുണ്ടെങ്കിലും അവയൊന്നും ദീർഘകാലത്തേക്ക് സൂക്ഷിച്ചുവെക്കാൻ പറ്റുന്ന 'തടി' ആയി മാറുന്നില്ലെന്നാണ് പഠനം പറയുന്നത്. പല പ്രദേശങ്ങളിലും മരങ്ങളുടെ വളർച്ച മാസങ്ങൾക്ക് മുമ്പേ നിൽക്കുന്നുണ്ടെങ്കിലും അവ പ്രകാശസംശ്ലേഷണം തുടർന്നുകൊണ്ടേയിരിക്കുന്നു.
കിഴക്കൻ അമേരിക്കയിൽ 36 ശതമാനവും കാലിഫോർണിയയിൽ 26 ശതമാനവും കാർബൺ വലിച്ചെടുക്കപ്പെടുന്നത് മരങ്ങളുടെ വളർച്ച പൂർണമായും നിലച്ചശേഷമാണ്. ഈ കാർബൺ തടിയായി മാറുന്നതിനു പകരം ഇലകൾക്കും മറ്റു താൽക്കാലിക പ്രക്രിയകൾക്കുമാണ് ഉപയോഗിക്കുന്നത്. ഇത് പെട്ടെന്നു തന്നെ വീണ്ടും അന്തരീക്ഷത്തിലേക്കു തിരിച്ചെത്തും.
വില്ലനാകുന്നത് ആഗോളതാപനം തന്നെ!
മരങ്ങളുടെ ഈ അവസ്ഥയ്ക്കു കാരണം മനുഷ്യൻ തന്നെ വരുത്തിവെച്ച ആഗോള താപനമാണ് എന്നതാണ് ഏറ്റവും വലിയ വൈരുധ്യം. ചൂടും വരൾച്ചയും കൂടുമ്പോൾ മരങ്ങളുടെ വളർച്ച പെട്ടെന്നു നിലയ്ക്കുന്നു. ''അന്തരീക്ഷം വരണ്ടതും ചൂടുള്ളതുമാകുന്ന നിമിഷം, മരങ്ങളുടെ വളർച്ച പെട്ടെന്നുതന്നെ നിൽക്കും. എന്നാൽ പ്രകാശസംശ്ലേഷണം ചെറിയ തോതിൽ തുടരുകയും ചെയ്യും,'' കൊളംബിയ ക്ലൈമറ്റ് സ്കൂളിന്റെ ഭാഗമായ ലാമോണ്ട്-ഡോഹെർട്ടി എർത്ത് ഒബ്സർവേറ്ററിയിലെ ഇക്കോക്ലൈമറ്റോളജിസ്റ്റും മുഖ്യ ഗവേഷകനുമായ മുകുന്ദ് പാലത് റാവു പറയുന്നു.
ചുരുക്കത്തിൽ, ഭൂമി ചൂടാകുന്തോറും മരങ്ങൾക്ക് തടിയുത്പാദിപ്പിക്കാനുള്ള ശേഷി നഷ്ടപ്പെടുന്നു. തടി വളരാത്ത മരങ്ങൾക്ക് കാർബണെ ദീർഘകാലം അന്തരീക്ഷത്തിൽ നിന്ന് മാറ്റി നിർത്താനും കഴിയില്ല. ഇതോടെ, ആഗോള താപനത്തെ തടുക്കാനുള്ള കാടുകളുടെ ശേഷി വലിയ തോതിൽ ഇടിയുകയാണ്.
നിലവിൽ ഭാവിയെക്കുറിച്ചുള്ള കാലാവസ്ഥാ പ്രവചനങ്ങൾ നടത്തുന്ന കമ്പ്യൂട്ടർ മോഡലുകളെല്ലാം കണക്കാക്കുന്നത് 'പച്ചപ്പ് കൂടിയാൽ കാർബൺ സംഭരണം കൂടും' എന്നാണ്. എന്നാൽ ഈ കണക്കുകൂട്ടലുകൾ തെറ്റാണെന്നും ഭാവിയിൽ കാടുകൾക്കു സംഭരിക്കാൻ കഴിയുന്ന കാർബണിന്റെ അളവ് നമ്മൾ അമിതമായി വിലയിരുത്തിയിരിക്കുകയാണെന്നും ഗവേഷകർ മുന്നറിയിപ്പ് നൽകുന്നു.
നിലവിൽ മനുഷ്യൻ അന്തരീക്ഷത്തിൽ നിന്ന് മാറ്റുന്ന 2.2 ബില്യൺ ടൺ കാർബണിൽ 99.9 ശതമാനവും കാടുകൾ വഴിയാണ് മാറ്റുന്നത്. യന്ത്രങ്ങൾ വഴി മാറ്റുന്നത് വെറും 0.1% മാത്രമാണ്. ഈ സാഹചര്യത്തിൽ കാടുകളുടെ ശേഷി കുറയുന്നത് മനുഷ്യരാശിയെ വലിയ പ്രതിസന്ധിയിലാക്കും.
സൗരോർജ പാനലുകൾ ലോകം മുഴുവൻ സ്ഥാപിച്ചതിനേക്കാൾ വേഗതയിൽ, വായുവിൽനിന്ന് കാർബൺ നേരിട്ട് വലിച്ചെടുക്കുന്ന അത്യാധുനിക സാങ്കേതികവിദ്യകൾ മനുഷ്യൻ ഇനി വികസിപ്പിക്കേണ്ടി വരും. കാടുകൾ നമ്മളെ കാക്കുമെന്ന അമിത പ്രതീക്ഷ കൈവിട്ട്, കാർബൺ പുറന്തള്ളൽ അടിയന്തരമായി വെട്ടിക്കുറയ്ക്കുക മാത്രമാണ് ആഗോള താപനത്തെ ചെറുക്കാൻ ഇനി നമ്മുടെ മുന്നിലുള്ള ഏക വഴി.
Historically, forests have been humanity's greatest defense against the Earth turning into a "giant fireball" from global warming. They were our primary source of relief, acting as massive sponges that absorbed the heavy carbon dioxide emissions from our vehicles and factories. However, recent scientific studies have issued a stark and alarming warning: we can no longer rely solely on forests to fight climate change. The shocking reality is that trees may no longer be able to absorb and store as much carbon as we originally thought, meaning our natural "green defense" is reaching its limit.