ഉറക്കമൊഴിക്കാൻ എനർജി ഡ്രിങ്ക് കുടിക്കുന്നവർ അറിയാൻ; ഹൃദയത്തിനെ കാത്തിരിക്കുന്നത് വലിയ അപകടം

ജോലിത്തിരക്കുകൾക്കിടയിലും പഠനസമയത്തും ഉറക്കമൊഴിക്കാൻ ഇന്ന് നിരവധി പേരാണ് എനർജി ഡ്രിങ്കുകളെ ആശ്രയിക്കുന്നത്. കോളജ് വിദ്യാർഥികളും ഐടി ജീവനക്കാരും ഉൾപ്പെടെയുള്ള യുവാക്കൾക്കിടയിൽ ഇത്തരം പാനീയങ്ങൾ കുടിക്കുന്ന സംസ്കാരം വളരെ വേഗത്തിലാണ് വളർന്നുകൊണ്ടിരിക്കുന്നത്. എന്നാൽ ശരീരത്തിൽ അമിതമായി കഫീൻ എത്തുമ്പോഴുണ്ടാകുന്ന ആരോഗ്യ പ്രശ്നങ്ങളെക്കുറിച്ച് പലരും ബോധവാന്മാരല്ല. എനർജി ഡ്രിങ്കുകളുടെ അമിതമായ ഉപയോഗം ഹൃദയത്തിന്റെ ആരോഗ്യത്തെ എങ്ങനെ ദോഷകരമായി ബാധിക്കുന്നുവെന്നതിനെക്കുറിച്ച് ഹൃദ്രോഗ വിദഗ്ധർ മുന്നറിയിപ്പ് നൽകുന്നു.

ഹൃദയമിടിപ്പിലെ അസാധാരണമായ മാറ്റങ്ങൾ

എനർജി ഡ്രിങ്കുകൾ കുടിക്കുന്നത് ഹൃദയമിടിപ്പ് അസാധാരണമായി വർധിക്കുന്നതിന് കാരണമാകുമെന്ന് ഡോക്ടർ വ്യക്തമാക്കുന്നു. ഈ പാനീയങ്ങളിൽ അടങ്ങിയിരിക്കുന്ന ഉയർന്ന അളവിലുള്ള കഫീൻ (Caffeine), ടോറിൻ (Taurine), ഗ്വരാന (Guarana) തുടങ്ങിയ ഉത്തേജക പദാർത്ഥങ്ങളാണ് ഇതിന് പ്രധാന കാരണം.

പെട്ടെന്ന് ഹൃദയമിടിപ്പ് കൂടുമ്പോൾ പലരും ഇത് ഉത്കണ്ഠയോ ഭയമോ ആണെന്ന് തെറ്റിദ്ധരിക്കാറുണ്ട്. എന്നാൽ യഥാർത്ഥത്തിൽ ശരീരത്തിൽ ഇത്തരം ഉത്തേജകങ്ങൾ അമിതമാകുന്നതാണ് നെഞ്ചിടിപ്പ് വർധിക്കുന്നതിന് പിന്നിൽ പ്രവർത്തിക്കുന്നത്.

ഹൃദയത്തിന്റെ താളവും രക്തസമ്മർദ്ദവും

കഫീൻ അമിതമായി ശരീരത്തിലെത്തുന്നത് ഹൃദയത്തിന്റെ സ്വാഭാവിക താളത്തെ തടസ്സപ്പെടുത്തുന്നു. എനർജി ഡ്രിങ്കുകളോ പ്രീ-വർക്കൗട്ട് പാനീയങ്ങളോ അമിതമായി കുടിച്ചതിന് ശേഷം നെഞ്ചിൽ ഒരു അസാധാരണമായ തുടിപ്പോ അല്ലെങ്കിൽ ഹൃദയമിടിപ്പ് ഇടയ്ക്ക് നിന്നുപോകുന്നതുപോലെയുള്ള തോന്നലോ അനുഭവപ്പെടുന്നതായി പല രോഗികളും പരാതിപ്പെടാറുണ്ടെന്ന് ഹൃദ്രോ​ഗ വിദ​ഗ്ധർ പറയുന്നു. കൂടാതെ, പൂർണ്ണ ആരോഗ്യവാന്മാരായ ആളുകളിൽ പോലും എനർജി ഡ്രിങ്കുകൾ കുടിക്കുന്നത് വഴി രക്തസമ്മർദ്ദം താത്കാലികമായി വർധിക്കാൻ കാരണമാകുന്നുണ്ട്. നേരിയ തോതിൽ രക്തസമ്മർദ്ദമുള്ള ആളുകൾ ഇത്തരം പാനീയങ്ങൾ സ്ഥിരമായി കുടിക്കുന്നത് അവരുടെ അവസ്ഥ അതിവേഗം കൂടുതൽ വഷളാകാൻ ഇടയാക്കും.

ഉറക്കമില്ലായ്മ സൃഷ്ടിക്കുന്ന അപകടങ്ങൾ

ഉറക്കത്തെ ദോഷകരമായി ബാധിക്കുന്നു എന്നതാണ് എനർജി ഡ്രിങ്കുകളുടെ മറ്റൊരു പ്രധാന പ്രശ്നം. ശരീരത്തിനും തലച്ചോറിനും ആവശ്യമായ വിശ്രമം ലഭിക്കാൻ മതിയായ ഉറക്കം അനിവാര്യമാണ്. എന്നാൽ എനർജി ഡ്രിങ്കുകൾ കുടിക്കുന്നത് ഉറക്കം നഷ്ടപ്പെടുത്തുകയും കൂടുതൽ സമയം ഉണർന്നിരിക്കാൻ പ്രേരിപ്പിക്കുകയും ചെയ്യുന്നു. ഇത് പതിവാകുമ്പോൾ ഉറക്കമില്ലായ്മ പരിഹരിക്കാൻ വീണ്ടും കഫീനെ ആശ്രയിക്കേണ്ടി വരികയും, പിന്നീട് ഒട്ടും ഉറങ്ങാൻ കഴിയാത്ത അവസ്ഥയിലേക്ക് കാര്യങ്ങൾ എത്തിക്കുകയും ചെയ്യുന്നു. ഈ സാഹചര്യത്തിൽ ഹൃദയത്തിന് ആവശ്യമായ വിശ്രമം ലഭിക്കാതെ വരികയും ശരീരം എപ്പോഴും കടുത്ത സമ്മർദ്ദത്തിലാവുകയും ചെയ്യും.

വ്യായാമത്തിന് മുൻപുള്ള ഉപയോഗം

ജിമ്മിൽ പോകുന്ന പലരും വ്യായാമത്തിന് മുൻപായി എനർജി ഡ്രിങ്കുകളോ പ്രീ-വർക്കൗട്ട് പാനീയങ്ങളോ കുടിക്കുന്ന ശീലമുള്ളവരാണ്. കഠിനമായ വ്യായാമം ചെയ്യുമ്പോൾ സ്വാഭാവികമായും ഹൃദയമിടിപ്പ് കൂടും. ഇതിനൊപ്പം ഉയർന്ന അളവിൽ ഉത്തേജക പദാർത്ഥങ്ങൾ കൂടി ശരീരത്തിലെത്തുന്നത് ഹൃദയത്തിന്റെ താളത്തെ ഗുരുതരമായി ബാധിക്കാൻ കാരണമാകും. മുൻപ് തിരിച്ചറിയപ്പെടാത്ത ഹൃദ്രോഗങ്ങൾ ഉള്ളവർക്ക് ഇത് വലിയ അപകടം വരുത്തിവെക്കുമെന്നും ഡോക്ടർ വിശദീകരിക്കുന്നു.

എല്ലാ പ്രശ്നങ്ങൾക്കും കാരണം കഫീൻ മാത്രമാണെന്ന് പറയാനാകില്ല. എന്നാൽ ഉറക്കമില്ലായ്മ, മാനസിക സമ്മർദ്ദം, നിർജ്ജലീകരണം, പുകവലി, മദ്യപാനം തുടങ്ങിയ അനാരോഗ്യകരമായ സാഹചര്യങ്ങൾക്കൊപ്പം എനർജി ഡ്രിങ്കുകൾ കൂടി ചേരുമ്പോഴാണ് അത് ഹൃദയാരോഗ്യത്തിന് പെട്ടെന്നുള്ള വലിയ ഭീഷണിയായി മാറുന്നത്.

Cardiologists warns that the growing reliance on energy drinks by students and professionals to stay awake can have severe consequences for cardiovascular health. Energy drinks contain high amounts of caffeine along with stimulants like taurine and guarana. This "stimulant overload" can cause sudden and unexpected spikes in heart rate and severe palpitations, which young people often mistake for anxiety.