കേരളം ഉൾപ്പെടെയുള്ള സംസ്ഥാനങ്ങളിലെ നിയമസഭ തെരഞ്ഞെടുപ്പ് ഫലത്തിനായുള്ള കാത്തിരിപ്പിനിടെ വോട്ടർമാരുടെ മനസ്സ് വോട്ടെണ്ണലിന് മുൻപേ വായിച്ചെടുക്കാൻ ശ്രമിക്കുകയാണ് ആഗോള പ്രവചന വിപണിയായ പോളിമാർക്കറ്റ്. കേവലം സർവേകളേക്കാൾ ഉപരിയായി, കൃത്യമായ ഡാറ്റയും കോടിക്കണക്കിന് രൂപയുടെ സാമ്പത്തിക പന്തയങ്ങളും അടിസ്ഥാനമാക്കിയുള്ള ഈ പ്രവചനങ്ങൾ രാഷ്ട്രീയ നിരീക്ഷകർക്കിടയിൽ വലിയ ചർച്ചയായിട്ടുണ്ട്. ഏറ്റവും പുതിയ കണക്കുകൾ പ്രകാരം അഞ്ച് സംസ്ഥാനങ്ങളിലായി ഏകദേശം ₹126.2 കോടിയിലധികം (1.34 കോടി ഡോളർ) തുകയാണ് നിക്ഷേപകർ വാതുവെപ്പിനായി വിനിയോഗിച്ചിരിക്കുന്നത്.
കേരളത്തിൽ ഇത്തവണയും ഭരണത്തുടർച്ചയ്ക്കാണ് കൂടുതൽ സാധ്യതയെന്ന് പോളിമാർക്കറ്റ് വിലയിരുത്തുന്നു. 61 ശതമാനം ജയസാധ്യതയുമായി സി.പി.ഐ.(എം.) നേതൃത്വം നൽകുന്ന മുന്നണി മുന്നിട്ടുനിൽക്കുമ്പോൾ, കോൺഗ്രസിന്റെ സാധ്യത 39 ശതമാനമായി വിപണി വിലയിരുത്തുന്നു. മുസ്ലീം ലീഗിന്റെ പ്രകടനം ഇത്തവണ നിർണ്ണായകമാകുമെന്നും 19 മുതൽ 21 വരെ സീറ്റുകൾ ലീഗ് നേടിയേക്കാമെന്നും വിപണിയിലെ ട്രെൻഡുകൾ സൂചിപ്പിക്കുന്നു. കേരളത്തിലെ ഈ രാഷ്ട്രീയ പോരാട്ടത്തിൽ മാത്രം ഏകദേശം ₹3.01 കോടിയുടെ (3.2 ലക്ഷം ഡോളർ) സാമ്പത്തിക വിനിമയമാണ് ഇതുവരെ നടന്നിട്ടുള്ളത്.
ഏറ്റവും വാശിയേറിയ പോരാട്ടം നടക്കുന്നത് പശ്ചിമ ബംഗാളിലാണ്. ബി.ജെ.പി.ക്ക് 53 ശതമാനവും തൃണമൂൽ കോൺഗ്രസിന് 47 ശതമാനവും ജയസാധ്യതയാണ് നിലവിൽ കൽപ്പിക്കപ്പെടുന്നത്. രണ്ട് പാർട്ടികളും തമ്മിലുള്ള നേരിയ വ്യത്യാസം നിക്ഷേപകരെയും അനിശ്ചിതത്വത്തിലാക്കുന്നുണ്ട്. ബംഗാളിലെ ഈ മത്സരത്തിൽ മാത്രം ₹37.6 കോടിയിലധികം (40 ലക്ഷം ഡോളർ) നിക്ഷേപം എത്തിയത് പോരാട്ടത്തിന്റെ തീവ്രത വെളിവാക്കുന്നു. തമിഴ്നാട്ടിൽ ഡി.എം.കെ. 77 ശതമാനം ജയസാധ്യതയുമായി ബഹുദൂരം മുന്നിലാണ്. എ.ഐ.എ.ഡി.എം.കെ. കേവലം 13 ശതമാനം സാധ്യതയിൽ ഒതുങ്ങുമ്പോൾ, തമിഴ്നാട് വിപണിയിലാണ് ഏറ്റവും കൂടുതൽ തുകയായ ₹84.7 കോടി (90 ലക്ഷം ഡോളർ) വാതുവെപ്പുകാർ നിക്ഷേപിച്ചിരിക്കുന്നത്.
അസമിലും പുതുച്ചേരിയിലും നിലവിലെ ഭരണകൂടങ്ങൾക്ക് വ്യക്തമായ മേധാവിത്വമാണ് പോളിമാർക്കറ്റ് പ്രവചിക്കുന്നത്. അസമിൽ ബി.ജെ.പി.യുടെ വിജയസാധ്യത 95 ശതമാനമായി ഉയർന്നുനിൽക്കുമ്പോൾ കോൺഗ്രസിന് വെറും 4 ശതമാനം സാധ്യതയാണ് നിക്ഷേപകർ നൽകുന്നത്. പുതുച്ചേരിയിൽ എ.ഐ.എൻ.ആർ.സി. 87 ശതമാനം സാധ്യതയുമായി കരുത്ത് തെളിയിക്കുന്നു.
അടുത്തിടെ അമേരിക്കൻ പ്രസിഡന്റ് ഡൊണാൾഡ് ട്രംപുമായി ബന്ധപ്പെട്ട വിവാദങ്ങളിലൂടെയാണ് പോളിമാർക്കറ്റ് ആഗോളതലത്തിൽ വീണ്ടും വാർത്തകളിൽ നിറഞ്ഞത്. ട്രംപിന്റെ മകൻ ഡൊണാൾഡ് ട്രംപ് ജൂനിയറിന് പോളിമാർക്കറ്റിൽ ഓഹരി പങ്കാളിത്തമുണ്ടെന്ന (Stake) വാർത്തകളും അദ്ദേഹം ഒരു പ്രവചന പ്ലാറ്റ്ഫോമിൽ ഉപദേശകനായി പ്രവർത്തിക്കുന്നതും വലിയ ചർച്ചയായിരുന്നു. ട്രംപ് ഭരണകൂടത്തിന്റെ വിദേശനയങ്ങളും യുദ്ധസാധ്യതകളും പോലും പോളിമാർക്കറ്റിലെ വാതുവെപ്പുകളെ സ്വാധീനിക്കുന്നുവെന്ന കണ്ടെത്തലുകളും ഇതിനിടെ പുറത്തുവന്നു. 2024-ലെ യു.എസ്. തിരഞ്ഞെടുപ്പിൽ ട്രംപിന്റെ വിജയം കൃത്യമായി പ്രവചിച്ചത് പോളിമാർക്കറ്റിന് വലിയ പ്രചാരം നേടിക്കൊടുത്തു. ഇൻസൈഡർ ട്രേഡിംഗുമായി ബന്ധപ്പെട്ട ചില നിയമനടപടികൾ നേരിടുന്നുണ്ടെങ്കിലും, രാഷ്ട്രീയ പ്രവചനങ്ങളുടെ ആഗോള കേന്ദ്രമായി പോളിമാർക്കറ്റ് മാറിക്കഴിഞ്ഞു. വോട്ടെടുപ്പിന് മുൻപുള്ള ഈ വലിയ സാമ്പത്തിക പന്തയങ്ങൾ ഇന്ത്യയിൽ എത്രത്തോളം യാഥാർത്ഥ്യമാകുമെന്ന് അറിയാൻ മെയ് നാലിന് വോട്ടെണ്ണൽ വരെ കാത്തിരിക്കേണ്ടി വരും.
English Summary: ₹126 Crore at Stake: Polymarket Predicts Winners for 2026 Indian State Elections.The market strongly favors the LDF (CPI(M)) with a 61% chance of retaining power, while the UDF (INC) trails at 39%. Specific interest is also surging in the IUML's performance, with bettors predicting they will secure between 19-21 seats.