ജന്തർ മന്തറിലെ വിലക്കും വോട്ടർ പട്ടികയിലെ വെട്ടും; പ്രതിരോധം തീർക്കാൻ ധ്രുവീകരണ തന്ത്രവുമായി കേന്ദ്രം

മുഖ്യ തെരഞ്ഞെടുപ്പ് കമ്മീഷണർ ​ഗ്യാനേഷ് കുമാറിനെതിരെ ഡൽഹിയിൽ ഇന്ത്യ മുന്നണിയും സിജെപിയും പ്രതിഷേധം തുടരുകയാണ്. ഈ സാഹചര്യം കൈകാര്യം ചെയ്യാൻ ബിജെപിയും കേന്ദ്ര സർക്കാരും പുതിയ രാഷ്ട്രീയ തന്ത്രങ്ങൾ ആവിഷ്കരിക്കുന്നതായാണ് റിപ്പോർട്ടുകൾ.

തെരഞ്ഞെടുപ്പ് കമ്മീഷന്റെ ഉള്ളിലെ ഭിന്നതകളും സുതാര്യതയില്ലായ്മയുമാണ് നിലവിലെ ഏറ്റവും വലിയ പ്രശ്നം. വോട്ടർമാരെ കൂട്ടത്തോടെ ഒഴിവാക്കിയ എസ്ഐആർ നടപടികളിലെ വീഴ്ചകൾ ചൂണ്ടിക്കാട്ടി തെരഞ്ഞെടുപ്പ് കമ്മീഷണർമാരായ സുഖ്ബീർ സിങ് സന്ധുവും വിവേക് ജോഷിയും പത്ത് മാസത്തിനിടെ 14 തവണ വിയോജിപ്പ് രേഖപ്പെടുത്തിയിരുന്നു എന്ന ഇന്ത്യൻ എക്സ്പ്രസ് റിപ്പോർട്ട് കമ്മീഷന്റെ വിശ്വാസ്യതയെ വലിയ രീതിയിൽ ചോദ്യം ചെയ്യുന്നതാണ്.

ഈ നാണക്കേട് മറയ്ക്കാനും പ്രതിഷേധം തണുപ്പിക്കാനും തിരക്കിട്ട നടപടികളാണ് ഇപ്പോൾ നടക്കുന്നത്. വോട്ടർമാരെ തിരികെ ചേർക്കാൻ 20 സംസ്ഥാനങ്ങളിൽ കമ്മീഷൻ പ്രത്യേക യജ്ഞം ആരംഭിച്ചു കഴിഞ്ഞു. ഡൽഹിയിൽ 47.7 ലക്ഷം പേരെ കരട് പട്ടികയിൽ നിന്ന് ഒഴിവാക്കിയതിൽ 20 ലക്ഷം പേരുടെ പ്രശ്നം പരിഹരിച്ചെന്ന് ഡൽഹി സിഇഒ അവകാശപ്പെടുന്നു. ബിഹാറിൽ 90,000 ക്യാമ്പുകൾ സംഘടിപ്പിച്ചും, ബം​ഗാളിൽ ഡെപ്യൂട്ടി ഇലക്ഷൻ ഓഫീസർമാരെ ഇറക്കിയും കാര്യങ്ങൾ വേ​ഗത്തിലാക്കാൻ കമ്മീഷൻ ശ്രമിക്കുന്നുണ്ട്. എല്ലാം സുതാര്യമാണെന്ന് വരുത്തിത്തീർക്കാൻ കമ്മീഷന്റെ നേതൃത്വത്തിൽ ഒരു വസ്തുതാ വിവരപ്പട്ടിക പുറത്തിറക്കാനും നീക്കമുണ്ട്.

വോട്ടർ പട്ടികയിലെ വൻ വീഴ്ചയെ കുറിച്ച് ചർച്ച ചെയ്യാതിരിക്കാൻ വ്യക്തമായ രാഷ്ട്രീയ തന്ത്രങ്ങളാണ് ബിജെപിയും കേന്ദ്ര സർക്കാരും പയറ്റുന്നത്. പ്രതിപക്ഷത്തിന്റെ ചോദ്യങ്ങൾക്ക് കൃത്യമായ മറുപടി നൽകുന്നതിന് പകരം, നുഴഞ്ഞുകയറ്റക്കാർ, ജനസംഖ്യാ ഘടനയിലെ മാറ്റം തുടങ്ങിയ വിഷയങ്ങൾ ഉയർത്തിക്കൊണ്ടുവന്ന് ജനങ്ങളുടെ ശ്രദ്ധ തിരിച്ചുവിടാനാണ് ബിജെപി പരോക്ഷമായി ശ്രമിക്കുന്നത്. ഇതിനുപുറമെ, രാഹുൽ ഗാന്ധിയെയും കോൺഗ്രസിനെയും ആം ആദ്മി പാർട്ടിയെയും ലക്ഷ്യമിട്ട്, അവർ ഡൽഹിയിൽ അരാജകത്വം സൃഷ്ടിക്കുകയാണെന്ന് ആരോപിച്ച് രാഷ്ട്രീയ പ്രത്യാക്രമണങ്ങളും സർക്കാർ തുടങ്ങിയിട്ടുണ്ട്.

സമരങ്ങളെ കൈകാര്യം ചെയ്യുന്ന സർക്കാരിന്റെ രീതിയും കടുത്ത വിമർശനങ്ങൾക്ക് വഴിവെച്ചിട്ടുണ്ട്. ​ഗതാ​ഗതക്കുരുക്കിന്റെയും പൊതുജനങ്ങളുടെ ബുദ്ധിമുട്ടിന്റെയും പേരുപറഞ്ഞ്, പ്രതിഷേധങ്ങളുടെ സ്ഥിരം വേദിയായ ജന്തർ മന്തറിന് പോലീസ് വിലക്കേർപ്പെടുത്തി. പകരം രാംലീല മൈതാനം, ബുരാരി ഗ്രൗണ്ട് തുടങ്ങിയ ഇടങ്ങളിലേക്ക് സമരക്കാരെ മാറ്റി. അധികാര കേന്ദ്രങ്ങളിൽ നിന്ന് പ്രതിഷേധങ്ങളെ അകറ്റി നിർത്താനുള്ള ആസൂത്രിത നീക്കമായാണ് ഇത് വിലയിരുത്തപ്പെടുന്നത്.

മുൻപ് നീറ്റ് പരീക്ഷാ വിവാദത്തിൽ അന്നത്തെ വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജിയിലേക്ക് നയിച്ച യുവജന സമരങ്ങളെ അനുനയിപ്പിച്ച അതേ തന്ത്രം തന്നെ പയറ്റാനാണ് സർക്കാരിവിടെയും ശ്രമിക്കുന്നത്. അന്ന് സിജെപി നേതാക്കളുമായി കേന്ദ്രമന്ത്രിമാർ ചർച്ച നടത്തി ഒത്തുതീർപ്പിലെത്തിയതുപോലെ, ഇപ്പോഴത്തെ യുവജന സമരങ്ങളെയും നേരിട്ട് ചർച്ചകൾ നടത്തി തണുപ്പിക്കാമെന്ന് സർക്കാർ കരുതുന്നു.

എന്നാൽ, ചില യുവജന സമരങ്ങളോട് അനുഭാവപൂർവ്വം പെരുമാറുകയും അവരെ ചർച്ചകളിലൂടെ ഒത്തുതീർപ്പിലെത്തിക്കാൻ ശ്രമിക്കുകയും ചെയ്യുമ്പോൾ തന്നെ, മുഖ്യപ്രതിപക്ഷ പാർട്ടികളെയും അവരുടെ നേതാക്കളെയും അരാജകത്വവാദികളായി ചിത്രീകരിക്കാനാണ് സർക്കാർ ശ്രമിക്കുന്നത്. തങ്ങൾക്ക് അനുകൂലമാക്കാൻ കഴിയുന്നവരെ ചേർത്തുനിർത്തുകയും, അല്ലാത്തവരെ രാഷ്ട്രീയമായി വേട്ടയാടുകയും ചെയ്യുന്ന സർക്കാരിന്റെ ഇരട്ടത്താപ്പാണ് ഇത് തുറന്നുകാട്ടുന്നത്. ഉയർന്ന സുരക്ഷാ മേഖലകളിൽ നിന്ന് സമരക്കാരെ മാറ്റിയപ്പോൾ സംയമനം പാലിച്ചുവെന്ന സർക്കാരിന്റെ അവകാശവാദം കേവലം മുഖം രക്ഷിക്കൽ മാത്രമാണ്.

ഉയർന്ന സുരക്ഷാ മേഖലകളിൽ നിന്ന് സമരക്കാരെ മാറ്റിയപ്പോൾ പൊലീസ് സംയമനം പാലിച്ചുവെന്നും കേസുകൾ എടുത്തില്ലെന്നും, തങ്ങൾ പ്രതിഷേധിക്കാനുള്ള അവകാശത്തിന് എതിരല്ലെന്നുമാണ് ബിജെപി വൃത്തങ്ങൾ അവകാശപ്പെടുന്നത്. തെരുവിലെ പ്രതിഷേധങ്ങൾ വഴി കമ്മീഷണറെ മാറ്റാനാകില്ലെന്നും അതിന് ഇംപീച്ച്മെന്റ് നടപടികൾ വേണമെന്നുമാണ് പാർട്ടിയുടെ വാദം. എന്നാൽ, മൗലികാവകാശങ്ങളെ മാനിക്കുന്നു എന്ന് പുറമെ പറയുമ്പോഴും, തങ്ങൾക്ക് അഹിതമായ സമരങ്ങളെ ഒതുക്കാനും വോട്ടർ പട്ടികയിലെ വൻ വീഴ്ചകളെ മറ്റു വിഷയങ്ങൾ ഉന്നയിച്ച് നിസ്സാരവൽക്കരിക്കാനുമുള്ള ബോധപൂർവമായ ശ്രമങ്ങളാണ് ഭരണകൂടത്തിന്റെ ഭാഗത്തുനിന്നും ഉണ്ടാകുന്നത് എന്ന് ഈ സംഭവവികാസങ്ങൾ വ്യക്തമാക്കുന്നു.