ഹോർമൂസ് കടക്കാമോ? കിട്ടും പൊന്നും വില! ജീവൻ വില നൽകി ജീവിതം കരയ്ക്കടുപ്പിക്കുന്ന ക്യാപ്റ്റൻമാർ

യാത്രയായാണ് നിലവിൽ ഹോർമൂസ് കടലിടുക്കിലൂടെയുള്ള കപ്പൽ യാത്ര കണക്കാക്കപ്പെടുന്നത്. ഏത് നിമിഷവും ഇറാന്റെ മിസൈലുകൾ കപ്പലുകളെ തകർത്തേക്കാം.

ലോകരാജ്യങ്ങളിലേക്കുള്ള എണ്ണ വിതരണം ഏറെക്കുറേ പൂർണമായും ഹോർമൂസ് വഴിയാണ് നടക്കുന്നത് എന്നത് കൊണ്ടുതന്നെ അത് തടസ്സപ്പെടുന്നത് സർവരാജ്യങ്ങളെയും കാര്യമായി തന്നെ ബാധിക്കും. ഇതിനാലാണ്, എന്ത് വില കൊടുത്തും ഇടുക്കിലൂടെയുള്ള കപ്പൽ ഗതാഗതം സുഗമമാക്കാൻ മധ്യസ്ഥച്ചർച്ചകൾ സജീവമാകുന്നതും.

ഹോർമൂസിലൂടെ ഏത് വിധേനയും കപ്പൽ ഇറക്കാനുള്ള തത്രപ്പാടിലാണ് ഉടമകൾ. ഇതിനായി ജീവൻ പണയം വെച്ച് ജോലി ചെയ്യുന്ന നാവികർക്ക് വൻ തുകയാണ് ശമ്പളവും ബോണസുമായി കപ്പലുടമകൾ വാഗ്ദാനം ചെയ്യുന്നത്. ഹോർമൂസിലൂടെ എണ്ണക്കപ്പലോടിക്കാൻ തയ്യാറാകുന്ന ക്യാപ്റ്റൻമാർക്ക് മാസം ഒരു ലക്ഷം ഡോളർ (ഏകദേശം 96 ലക്ഷത്തിലധികം ഇന്ത്യൻ രൂപ) വരെ ശമ്പളവും ഓരോ യാത്രയ്ക്കും 50,000 ഡോളർ വരെ ബോണസും നൽകുന്നുണ്ട്. സാധാരണയായി 15,000 ഡോളർ (പതിനാലര ലക്ഷത്തിനടുത്ത്) വരെ പ്രതിമാസം ശമ്പളം വാങ്ങുന്ന ക്യാപ്റ്റൻമാർക്കാണ് ഈ ഭീമമായ തുക വാഗ്ദാനം ചെയ്യുന്നത്. കടലിടുക്കിൽ കപ്പലുകൾക്ക് നേരെ ഇറാൻ ആക്രമണം കടുപ്പിക്കുന്ന സാഹചര്യത്തിലാണ് ഇത്തരമൊരു ശമ്പളവർധനവ്.

ഫിനാൻഷ്യൽ ടൈംസ് റിപ്പോർട്ട് അനുസരിച്ച്, ഹോർമൂസിലൂടെയുള്ള ചരക്കുകൂലി പ്രതിദിനം ഏകദേശം 1.3 മില്യൺ ഡോളറായി (ഏകദേശം 13 ലക്ഷം ഡോളർ) ഉയർന്നിട്ടുണ്ട്. കഴിഞ്ഞ വർഷമിത് പ്രതിദിനം 20,000 മുതൽ 50,000 ഡോളർ വരെ മാത്രമായിരുന്നു.

സാധാരണ സാഹചര്യങ്ങളിൽ, ടാങ്കർ കപ്റ്റന്മാർക്ക് പ്രതിമാസം 15,000 ഡോളറോളവും (ഏകദേശം $15,000) സാധാരണ നാവികർക്ക് 1,500 ഡോളർ വരെയുമാണ് വരുമാനം. തെക്കൻ ചെങ്കടലിലും ഒമാൻ ഉൾക്കടലിലും ജോലി ചെയ്യുമ്പോൾ ജീവനക്കാർക്ക് ഇരട്ടി വേതനം ലഭിക്കും. എന്നാൽ ഹോർമുസ് കടലിടുക്ക് മുറിച്ചുകടക്കുന്ന സമയത്ത്, സാധാരണ നാവികർക്ക് അവരുടെ സാധാരണ വേതനത്തിന്റെ നാല് മുതൽ ആറ് മടങ്ങ് വരെ തുക ലഭിക്കാറുണ്ട്.

ഒരു ശരാശരി ക്രൂഡ് ക്യാരിയറിന് 2 മില്യൺ ബാരൽ എണ്ണ വരെ കടത്താനാവും. 35 പേരാവും ഈ കപ്പലിലെ ക്രൂ. ഗൾഫിലെത്തിയാൽ ചരക്ക് കയറ്റിറക്കവും കടലിടുക്ക് തിരിച്ചു കടക്കലുമൊക്കെയായി നാല് ദിവസത്തോളം കപ്പലുകൾ ഈ മേഖലയിലുണ്ടാകും.

ഈ ഇടുക്കിലൂടെയുള്ള ഭൂരിഭാഗം യാത്രകളും, തുടർച്ചയായി പോയിവരുന്ന ഷട്ടിൽ സർവീസുകളായാണ് നടത്തപ്പെടുന്നത്. ഇത് മാസങ്ങളോളം ജീവനക്കാർക്ക് ഉയർന്ന വേതനം നേടാൻ അവസരമൊരുക്കുന്നുണ്ടെങ്കിലും, മിസൈൽ, ഡ്രോൺ ആക്രമണങ്ങളുടെ നിരന്തരമായ ഭീഷണിക്ക് മുന്നിലേക്ക് ഇവരെ തള്ളിവിടുകയും ചെയ്യുന്നു.

കഴിഞ്ഞ കുറച്ച് ആഴ്ചകളായി വെല്ലുവിളി കുറച്ച് കൂടുതലുമാണ്. സെപ്റ്റംബർ 20 മുതലുള്ള കാലയളവിൽ 14 ആക്രമണങ്ങളാണ് കപ്പലുകൾക്ക് നേരെയുണ്ടായത്. നാല് വെസലുകൾ പിടിച്ചുവയ്ക്കുകയും ചെയ്തു. ഫെബ്രുവരിയിൽ സംഘർഷം തുടങ്ങിയത് മുതൽ 93 കപ്പലുകൾ തകർക്കപ്പെട്ടിട്ടുണ്ടെന്നാണ് അന്താരാഷ്ട്ര മാരിടൈം സംഘടന നൽകുന്ന റിപ്പോർട്ട്.

നിലവിൽ വളരെ കുറച്ച് കപ്പലുകൾ മാത്രമേ ഹോർമൂസിലൂടെയുള്ള സാഹസികയാത്രയ്ക്ക് തയ്യാറായി മുന്നോട്ട് വന്നിട്ടുള്ളൂ. ചില ടാങ്കറുകൾ ഒമാൻ ഉൾക്കടലിലെ ഫുജൈറ തീരത്തേക്ക് ക്രൂഡ് ഓയിൽ എത്തിക്കുകയും, അവിടെവച്ച് തുടർ വിതരണത്തിനായി മറ്റ് കപ്പലുകളിലേക്ക് ചരക്ക് മാറ്റുകയുമാണ് ചെയ്യുന്നത്.

ഇതോടൊപ്പം കപ്പലുടമകൾ യുദ്ധഭീഷണി മുൻനിർത്തിയുള്ള വൻ തുകയുടെ ഇൻഷുറൻസ് പ്രീമിയങ്ങളും നൽകേണ്ടി വരുന്നുണ്ട്. ഈ മേഖലയിൽ സർവീസ് നടത്തുന്ന ടാങ്കറുകൾ കപ്പലിന്റെ ആകെ മൂല്യത്തിന്റെ 6 മുതൽ 10 ശതമാനം വരെ തുകയാണ് പ്രീമിയമായി അടയ്ക്കുന്നത്. ഒരു സൂപ്പർടാങ്കറിനെ സംബന്ധിച്ചിടത്തോളം, പേർഷ്യൻ ഉൾക്കടലിലേക്കുള്ള ഒരൊറ്റ യാത്രയ്ക്ക് മാത്രം ഇത് 20 മില്യൺ ഡോളർ (ഏകദേശം 2 കോടി ഡോളർ) വരെ വരാം.

ഇന്ധനവില വർദ്ധനവ് പ്രതിസന്ധിയുടെ ആഘാതം വീണ്ടും കൂട്ടുകയാണ്. റിപ്പോർട്ടുകളനുസരിച്ച്, ഫുജൈറയിൽ സൂപ്പർടാങ്കറുകൾ സാധാരണയായി ഉപയോഗിക്കുന്ന ഫ്യുവൽ ഓയിലിന്റെ വില തിങ്കളാഴ്ച ടണ്ണിന് 686 ഡോളറിലെത്തി, ഇത് കഴിഞ്ഞ വർഷത്തെ അപേക്ഷിച്ച് 67 ശതമാനം വർധനവാണ്.

ഇതിന്റെ ഫലമായി, ക്രൂഡ് ഓയിൽ ലക്ഷ്യസ്ഥാനത്ത് എത്തുന്നതിന് മുമ്പ് തന്നെ ഓരോ ചരക്കിന്റെയും ഗതാഗതച്ചെലവ് കുത്തനെ ഉയരുകയാണ്. ആക്രമണങ്ങൾ ഒഴിവാക്കാനായി ഭൂരിഭാഗം കപ്പലുകളും ഇപ്പോൾ ജിപിഎസ് സംവിധാനങ്ങൾ ഓഫ് ചെയ്ത് രാത്രികാലങ്ങളിലാണ് ഹോർമുസിലൂടെ യാത്ര ചെയ്യുന്നത്. ഒമാൻ തീരത്തുള്ള ഈ സമുദ്രപാതയ്ക്ക് സമീപം യു.എസ് നാവികസേന പ്രതിരോധ വ്യോമസജ്ജീകരണങ്ങളും ഏർപ്പെടുത്തിയിട്ടുണ്ട്.

വിൻഡ്‌വാർഡിന്റെ കണക്കനുസരിച്ച്, ഒക്ടോബർ 4-ന് 13 കപ്പലുകൾ മാത്രമാണ് ഈ ഹോർമൂസിലൂടെ കടന്നുപോയത്. കഴിഞ്ഞയാഴ്ട ഇത് 24 ആയിരുന്നു. എന്നാൽ സംഘർഷം ആരംഭിക്കുന്നതിന് മുമ്പ്, ലോകത്തെ അഞ്ചിലൊന്ന് എണ്ണയും ദ്രവീകൃത പ്രകൃതിവാതകവും വഹിച്ചുകൊണ്ട് പ്രതിദിനം ഏകദേശം 135 കപ്പലുകളായിരുന്നു ഹോർമുസ് കടലിടുക്കിലൂടെ സർവീസ് നടത്തിയിരുന്നത്.