ഇറാനെ ലക്ഷ്യമിട്ട് അമേരിക്ക നടത്തിയ ‘ഓപ്പറേഷൻ എപിക് ഫ്യൂറി’ സൈനിക നീക്കത്തിനിടെ യുഎസിന് വൻ വ്യോമനാശനഷ്ടങ്ങൾ സംഭവിച്ചതായി റിപ്പോർട്ടുകൾ. അമേരിക്കൻ കോൺഗ്രസിന്റെ ഗവേഷണ വിഭാഗമായ കോൺഗ്രഷണൽ റിസർച്ച് സർവീസ് (CRS) പുറത്തുവിട്ട വിവരങ്ങൾ അടിസ്ഥാനമാക്കി അന്താരാഷ്ട്ര മാധ്യമങ്ങളാണ് ഇക്കാര്യം പുറത്തുവിട്ടിരിക്കുന്നത്. അമേരിക്കയുടെ അത്യാധുനിക വ്യോമസേന സംവിധാനങ്ങൾക്കാണ് ആക്രമണത്തിൽ വലിയ നാശനഷ്ടമുണ്ടായത്. യുദ്ധവിമാനങ്ങൾ, ഡ്രോണുകൾ, വ്യോമനിരീക്ഷണ സംവിധാനങ്ങൾ എന്നിവ ഉൾപ്പെടെ കുറഞ്ഞത് 42 വ്യോമയാനങ്ങൾ തകർന്നതായും ഗുരുതര കേടുപാടുകൾ സംഭവിച്ചതായും റിപ്പോർട്ടിൽ പറയുന്നു. യഥാർഥ നാശനഷ്ടങ്ങളുടെ എണ്ണം ഇതിലും കൂടുതലാകാമെന്നും വിലയിരുത്തലുണ്ട്.
ഏറ്റവും കൂടുതൽ നഷ്ടം സംഭവിച്ചത് ഡ്രോണുകൾക്ക്
ഏറ്റവും കൂടുതൽ നഷ്ടംസംഭവിച്ചത് എംക്യു-9 റീപ്പർ (MQ-9 Reaper) ഡ്രോൺ വിഭാഗത്തിനാണെന്നാണ് സൂചന. ആകെ 24 ഡ്രോണുകൾ നഷ്ടമായതായാണ് പുറത്തുവന്ന കണക്ക്. കൃത്യമായ നിരീക്ഷണത്തിനും ആക്രമണങ്ങൾക്കും വ്യാപകമായി ഉപയോഗിക്കുന്ന ഡ്രോൺ സംവിധാനമാണിത്. യുഎസ് വ്യോമസേനയുടെ പ്രധാന ആക്രമണവിമാനങ്ങളിലൊന്നായ എഫ്-15ഇ സ്ട്രൈക്ക് ഈഗിൾ (F-15E Strike Eagle) വിഭാഗത്തിൽപ്പെട്ട നാല് യുദ്ധവിമാനങ്ങൾക്കും നാശനഷ്ടം സംഭവിച്ചതായി റിപ്പോർട്ടിൽ വ്യക്തമാക്കുന്നു. അമേരിക്കയുടെ അത്യാധുനിക സ്റ്റെൽത്ത് യുദ്ധവിമാനങ്ങളിലൊന്നായ എഫ്-35എ ലൈറ്റ്നിങ് II (F-35A Lightning II) വിഭാഗത്തിൽപ്പെട്ട ഒരു വിമാനവും പട്ടികയിൽ ഉൾപ്പെട്ടിട്ടുണ്ട്.
ആകാശത്തുവെച്ച് യുദ്ധവിമാനങ്ങൾക്ക് ഇന്ധനം നിറയ്ക്കാൻ ഉപയോഗിക്കുന്ന കെസി-135 സ്ട്രാറ്റോടാങ്കർ (KC-135 Stratotanker) വിഭാഗത്തിൽപ്പെട്ട ഏഴ് വിമാനങ്ങൾക്കും കേടുപാടുകൾ സംഭവിച്ചതായും റിപ്പോർട്ടിൽ പറയുന്നു. എ-10 തണ്ടർബോൾട്ട് II (A-10 Thunderbolt II) ആക്രമണവിമാനം ഒന്ന്, വ്യോമനിരീക്ഷണത്തിനും റഡാർ ഏകോപനത്തിനുമായി ഉപയോഗിക്കുന്ന ഇ-3 സെൻട്രി AWACS (E-3 Sentry) വിമാനം എന്നിവയും നഷ്ടപ്പെട്ടവയുടെ പട്ടികയിൽ ഉൾപ്പെടുന്നു.
പ്രത്യേക സൈനിക ദൗത്യങ്ങൾക്കായി ഉപയോഗിക്കുന്ന എംസി-130ജെ കമാൻഡോ II (MC-130J Commando II) വിഭാഗത്തിൽപ്പെട്ട രണ്ട് വിമാനങ്ങൾക്കും കേടുപാടുകൾ സംഭവിച്ചതായി റിപ്പോർട്ടിൽ പറയുന്നു. കടൽസുരക്ഷാ നിരീക്ഷണത്തിനായി ഉപയോഗിക്കുന്ന എംക്യു-4സി ട്രൈറ്റൺ (MQ-4C Triton) ഡ്രോണും രക്ഷാപ്രവർത്തനങ്ങൾക്കും പ്രത്യേക ഓപ്പറേഷനുകൾക്കുമായി വിനിയോഗിക്കുന്ന എച്ച്എച്ച്-60ഡബ്ല്യു ജോളി ഗ്രീൻ II (HH-60W Jolly Green II) ഹെലികോപ്റ്ററും നഷ്ടപ്പെട്ടവയുടെ പട്ടികയിൽ ഉൾപ്പെട്ടിട്ടുണ്ട്.
യുദ്ധച്ചെലവ് കുത്തനെ ഉയർന്നതായി വിലയിരുത്തൽ
ഇറാനെതിരായ സൈനിക നടപടികൾക്കായി അമേരിക്ക കണക്കാക്കിയ യുദ്ധച്ചെലവ് 29 ബില്യൺ യുഎസ് ഡോളറിലെത്തിയതായും റിപ്പോർട്ടുകൾ വ്യക്തമാക്കുന്നു. ഇന്ത്യൻ രൂപയിൽ ഇത് ഏകദേശം 2.4 ലക്ഷം കോടിയിലധികം വരും. അത്യാധുനിക സൈനിക ഉപകരണങ്ങൾ നന്നാക്കാനും പകരം പുതിയ ഉപകരണങ്ങൾ എത്തിക്കാനും വേണ്ടിയുള്ള ചെലവുകളാണ് യുദ്ധച്ചെലവ് ഉയരാൻ പ്രധാന കാരണമായി ചൂണ്ടിക്കാണിക്കപ്പെടുന്നത്. മെയ് 12ന് നടന്ന ഹൗസ് കോംട്രോളർ നടപടിക്കിടെയാണ് ഈ വിവരങ്ങൾ ഔദ്യോഗികമായി പരാമർശിക്കപ്പെട്ടതെന്നും റിപ്പോർട്ടുകൾ പറയുന്നു.
എന്താണ് കോൺഗ്രഷണൽ റിസർച്ച് സർവീസ്?
അമേരിക്കൻ കോൺഗ്രസിനും വിവിധ കമ്മിറ്റികൾക്കും പ്രതിരോധം, സുരക്ഷ, വിദേശനയം തുടങ്ങിയ വിഷയങ്ങളിൽ പഠന റിപ്പോർട്ടുകളും വിലയിരുത്തലുകളും നൽകുന്ന ഗവേഷണ ഏജൻസിയാണ് കോൺഗ്രഷണൽ റിസർച്ച് സർവീസ് (CRS).
പശ്ചിമേഷ്യൻ സംഘർഷത്തിൽ പുതിയ ആശങ്ക
ഇറാൻ വ്യോമാതിർത്തിക്കുള്ളിൽ അമേരിക്ക നേരിട്ടതായി റിപ്പോർട്ട് ചെയ്യുന്ന ഈ തിരിച്ചടി പശ്ചിമേഷ്യയിലെ സൈനിക സാഹചര്യങ്ങളെ കൂടുതൽ സങ്കീർണമാക്കുമെന്ന വിലയിരുത്തലും ഉയരുന്നുണ്ട്. കൂടുതൽ വിവരങ്ങൾ പുറത്തുവരുന്നതിനനുസരിച്ച് നാശനഷ്ടങ്ങളുടെ യഥാർഥ വ്യാപ്തി കൂടുതൽ വ്യക്തമാകാനിടയുണ്ടെന്നും അന്താരാഷ്ട്ര പ്രതിരോധ നിരീക്ഷകർ ചൂണ്ടിക്കാണിക്കുന്നു.
English Summary: Reports citing the US Congressional Research Service claim that the US suffered major aerial losses during the alleged “Operation Epic Fury” targeting Iran, including drones, fighter jets, and surveillance aircraft.