മാസപ്പടി കേസിൽ പ്രതിപക്ഷ നേതാവ് പിണറായി വിജയന് ആശ്വാസം. കേസിലെ വിജിലൻസ് അന്വേഷണം സുപ്രിംകോടി സ്റ്റേ ചെയ്തു. സിഎംആർഎൽ-എക്സാലോജിക് സാമ്പത്തിക ഇടപാടുമായി ബന്ധപ്പെട്ട് വിജിലൻസ് എഫ്ഐആർ രജിസ്റ്റർ ചെയ്യണമെന്ന ഹൈക്കോടതി ഉത്തരവിനെതിരെ പിണറായി വിജയനും കുടുംബവും നൽകി ഹർജി പരിഗണിച്ചാണ് കോടതി നടപടി.
ഹൈക്കോടതി ഉത്തരവ് അടിസ്ഥാനമാക്കിയുള്ള കേസിലെ തുടരന്വേഷണം സുപ്രീം കോടതി താൽക്കാലികമായി സ്റ്റേ ചെയ്തിട്ടുണ്ട്. ഒരാഴ്ചത്തേക്കാണ് സ്റ്റേ. ജസ്റ്റിസ് ജോയ് മല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ വെക്കേഷൻ ബെഞ്ചാണ് ഹർജി പരിഗണിച്ചത്. കേസിൻ്റെ പ്രാധാന്യവും സംവേദനക്ഷമതയും കണക്കിലെടുത്ത്, ദസറ അവധിക്കാലത്ത് വാദം കേൾക്കുന്നതിനായി സുപ്രീംകോടതി പ്രത്യേക ബെഞ്ച് രൂപീകരിക്കുകയും ഹർജി പട്ടികപ്പെടുത്തുകയുമായിരുന്നു.
കേസിൽ എന്തുകൊണ്ടാണ് ഇപ്പോഴീ നടപടികൾ എന്നാണ് സുപ്രിംകോടതി പ്രധാനമായും ഉന്നയിച്ച ചോദ്യം. ഇഡിയുടെ കത്തിന്റെ അടിസ്ഥാനത്തിലാണ് കേസെടുത്തതെന്ന് സംസ്ഥാന സർക്കാർ മറുപടി നൽകിയെങ്കിലും കോടതിക്ക് തൃപ്തിയായില്ല. ആരോപണവിധേയരുടെ ഭാഗം ഹൈക്കോടതി ഡിവിഷൻ ബെഞ്ച് കേൾക്കേണ്ടതായിരുന്നു എന്ന് കോടതി നിരീക്ഷിച്ചു. വിഷയം ഹൈക്കോടതിയുടെ മുമ്പിലേക്ക് തിരിച്ചയയ്ക്കുമെന്നും കോടതി അറിയിച്ചിട്ടുണ്ട്.
പ്രാഥമിക അന്വേഷണം നടത്താൻ സംസ്ഥാനം ഇതിനകം തന്നെ ഒരു പ്രത്യേക അന്വേഷണ സംഘം (എസ്ഐടി) രൂപീകരിച്ചിട്ടുണ്ടെന്നും അതിനാൽ, പിണറായി വിജയന്റെ വാക്കുകൾ കേൾക്കാതെ ഹൈക്കോടതി തിടുക്കത്തിൽ പ്രവർത്തിക്കുകയും എഫ്ഐആർ രജിസ്റ്റർ ചെയ്യാൻ ഉത്തരവിടുകയും ചെയ്യരുതായിരുന്നുവെന്നും കോടതി ചൂണ്ടിക്കാട്ടി. മറ്റ് അന്വേഷണ ഏജൻസികളുടെ കാര്യങ്ങളിൽ ഇടപെടരുതെന്ന് കോടതി ഇ.ഡി.ക്കും മുന്നറിയിപ്പ് നൽകി.
കേസിൽ എഫ്ഐആർ നിലനിൽക്കും പക്ഷേ അന്വേഷണം തടയും എന്ന നിലപാടാണ് കോടതിയുടേത്. സംസ്ഥാന എസ്‌ഐടിയുടെ പ്രാഥമിക അന്വേഷണം അവസാനിക്കുന്നത് വരെ കാത്തിരിക്കാതെ വിജയനെതിരെ എഫ്ഐആർ രജിസ്റ്റർ ചെയ്യണമെന്ന് ആവശ്യപ്പെട്ട് പരാതിക്കാരനായ കെ എം ഷാജഹാൻ ഹൈക്കോടതിയിൽ ഹർജി സമർപ്പിച്ചതിനെതിരെ കോടതി പ്രതിഷേധവും രേഖപ്പെടുത്തിയിട്ടുണ്ട്.
കേസും കോടതി ഇടപെടലും
കൊച്ചിൻ മിനറൽസും ടി വീണയുടെ ഉടമസ്ഥതയിലുള്ള എക്സാലോജിക് സൊല്യൂഷൻസും തമ്മിലുല്ള സാമ്പത്തിക ഇടപാടുകളിലെ ക്രമക്കേടുകളുമായി ബന്ധപ്പെട്ടതാണ് കേസ്.
ഇതിൽ കുറ്റകരമായ ചില തെളിവുകൾ ഇഡി കേരള പൊലീസിന് കൈമാറിയിരുന്നു. എന്നാൽ എഫ്ഐആർ ഉടൻ രജിസ്റ്റർ ചെയ്യുന്നതിന് പകരം പ്രാഥമിക അന്വേഷണം നടത്താൻ പ്രത്യേക അന്വേഷണ സംഘം(എസ്ഐടി) രൂപീകരിക്കാനാണ് സംസ്ഥാനം തീരുമാനിച്ചത്.
എന്നാൽ മുൻ മുഖ്യമന്ത്രിയും സിപിഐ (എം) നേതാവുമായ വി എസ് അച്യുതാനന്ദൻ പ്രതിപക്ഷ നേതാവായിരിക്കെ അദ്ദേഹത്തിന്റെ അഡീഷണൽ പ്രൈവറ്റ് സെക്രട്ടറിയായി സേവനമനുഷ്ഠിച്ചിട്ടുള്ള കെ എം ഷാജഹാൻ എന്ന അഭിഭാഷകൻ ഈ നീക്കത്തെ ചോദ്യം ചെയ്ത് കേരള ഹൈക്കോടതിയെ സമീപിക്കുകയും എഫ്ഐആർ രജിസ്റ്റർ ചെയ്യണമെന്ന് ആവശ്യപ്പെടുകയും ചെയ്തു.
ഒക്ടോബർ 9 ന്, ഹൈക്കോടതിയുടെ സിംഗിൾ ബെഞ്ച് ഷാജഹാന്റെ ഹർജി അനുവദിക്കുകയും വിജയൻ, വീണ, റിയാസ്, അഴിമതി സംശയിക്കുന്ന നിഖിൽ പി, ഹസ്സൻ വാരിഷ്, ഷൈജൽ മുഹമ്മദ്, നന്ദുലാൽ എം എന്നിവരുൾപ്പെടെയുള്ളവർക്കെതിരെ ഇഡിയുടെ വിവരങ്ങളുടെ അടിസ്ഥാനത്തിൽ എഫ്ഐആർ രജിസ്റ്റർ ചെയ്യാൻ സംസ്ഥാന വിജിലൻസ് ആൻഡ് ആന്റി കറപ്ഷൻ ബ്യൂറോ (വിഎസിബി)യോട് ഉത്തരവിടുകയും ചെയ്തു.
പിണറായി വിജയൻ, വീണ, റിയാസ് തുടങ്ങിയവർ അപ്പീലുകൾ വഴി ഹൈക്കോടതിയുടെ ഡിവിഷൻ ബെഞ്ചിന് മുമ്പാകെ ഇത് ചോദ്യം ചെയ്തു. എന്നാൽ അപ്പീൽ തുടരാൻ അനുമതി ലഭിച്ചില്ല. തുടർന്നാണ് ഹർജിയുമായി ഇവർ സുപ്രിംകോടതിയെ സമീപിച്ചത്.
Relief for Pinarayi Vijayan in the Masappadi case as the Supreme Court has stayed the vigilance probe. The court passed the order while hearing petitions filed by Pinarayi Vijayan and his family challenging the Kerala High Court’s directive to register a vigilance FIR over the financial transactions between CMRL and Exalogic.