രാജ്യത്തെ പരീക്ഷാ സംവിധാനങ്ങളിലെ ചോർച്ചകളും ക്രമക്കേടുകളും തടയുന്നതിനായി കേന്ദ്ര സർക്കാർ രൂപീകരിച്ച പുതിയ കർമ്മസേനയുടെ പ്രഖ്യാപനം ഇന്നലെയാണ് പുറത്തുവന്നത്. വെറുമൊരു ഭരണപരമായ മാറ്റം എന്നതിലുപരി, പരീക്ഷാ നടത്തിപ്പിനെ ഒരു 'എൻജിനീയറിങ്', സുരക്ഷാ' പ്രശ്നമായി കണ്ട് പരിഹരിക്കാനാണ് സർക്കാർ ശ്രമിക്കുന്നത്. ഇന്ത്യയുടെ സാങ്കേതിക, ശാസ്ത്ര, അക്കാദമിക മേഖലകളിലെ ഏറ്റവും മികച്ച വ്യക്തികളെയാണ് ഇതിനായി നിയോഗിച്ചിരിക്കുന്നത്.
ഇൻഫോസിസ് സഹസ്ഥാപകൻ നന്ദൻ നിലേക്കനി അധ്യക്ഷനായ സമിതിയോട്, പൊതുപരീക്ഷകളിലുള്ള ജനവിശ്വാസ്യത വീണ്ടെടുക്കുന്നതിനായി ഘടനാപരവും സാങ്കേതികവിദ്യയിൽ അധിഷ്ഠിതവുമായ പരിഷ്കാരങ്ങൾ നിർദേശിക്കാൻ ആവശ്യപ്പെട്ടിട്ടുണ്ട്. പ്രധാനമന്ത്രി വ്യക്തമാക്കിയതനുസരിച്ച്, പരീക്ഷാ പരിഷ്കരണങ്ങളുമായി ബന്ധപ്പെട്ട് സർക്കാരിന്റെ അടുത്ത നടപടികൾ ഈ സമിതി സമർപ്പിക്കുന്ന ശുപാർശകളുടെ അടിസ്ഥാനത്തിലായിരിക്കും.
നാഷണൽ ടെസ്റ്റിങ് ഏജൻസി പോലുള്ള പരീക്ഷാ നടത്തിപ്പ് സംവിധാനങ്ങളിലെ ഘടനാപരമായ പരിഷ്കാരങ്ങൾ ഈ സമിതി പരിശോധിക്കുമെന്നാണ് പ്രതീക്ഷിക്കുന്നത്. കൂടാതെ, ചോദ്യപ്പേപ്പർ ചോർച്ച തടയുന്നതിനായി സാങ്കേതികവിദ്യയുടെ കൂടുതൽ ഉപയോഗം ശുപാർശ ചെയ്യുക, സുരക്ഷ മെച്ചപ്പെടുത്തുക, ഒപ്പം ഭാവിയിൽ നടക്കാനിരിക്കുന്ന പരീക്ഷകളുടെ വിശ്വാസ്യത വർധിപ്പിക്കുക എന്നിവയും ഇതിലൂടെ ലക്ഷ്യമാക്കുന്നു.
ഈ മാറ്റങ്ങൾക്ക് ചുക്കാൻ പിടിക്കുന്ന പ്രധാന വ്യക്തികൾ ആരൊക്കെയാണ്? എന്തുകൊണ്ടാണ് അവരെ തിരഞ്ഞെടുത്തത്?
ഇന്ത്യയുടെ സാങ്കേതിക മേഖലയിൽ ഏറെ സുപരിചിതമായ പേരാണ് നന്ദൻ നിലേക്കനിയുടേത്. ഇന്ത്യയിലെ ഏറ്റവും വലുതും വിജയകരവുമായ ഐടി കമ്പനികളിലൊന്നായ ഇൻഫോസിസിന്റെ സഹസ്ഥാപകനായ അദ്ദേഹം, നിലവിൽ കമ്പനി ബോർഡിന്റെ നോൺ-എക്സിക്യൂട്ടീവ് ചെയർമാൻ കൂടിയാണ്. യുണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യയുടെ (UIDAI) തലവനായിരുന്ന അദ്ദേഹം ആധാർ കാർഡുകൾ വികസിപ്പിച്ചെടുക്കുന്നതിൽ നിർണായക പങ്ക് വഹിച്ചു.
ഐഐടി ബോംബെയിൽ നിന്നാണ് നന്ദൻ നിലേക്കനി എഞ്ചിനീയറിങ് വിദ്യാഭ്യാസം പൂർത്തിയാക്കിയത്. പരീക്ഷാ സംവിധാനങ്ങളിലെ സാങ്കേതികവിദ്യയും ഡാറ്റാ സുരക്ഷയും മെച്ചപ്പെടുത്താൻ അദ്ദേഹത്തിന് സഹായിക്കാനാകുമെന്നാണ് സർക്കാരിന്റെ വിലയിരുത്തൽ. ഇതിനുപുറമെ, പരീക്ഷകൾക്കായി ഒരിക്കലും ഹാക്ക് ചെയ്യാൻ സാധിക്കാത്തവിധം എൻഡ്-ടു-എൻഡ് എൻക്രിപ്റ്റഡ് ആയ ഒരു സുരക്ഷിത പ്ലാറ്റ്ഫോം രൂപീകരിക്കാൻ സർക്കാരിനെ സഹായിക്കാനും അദ്ദേഹത്തിന് സാധിക്കും. കൂടുതൽ മികച്ചതും സുരക്ഷിതവുമായ ഒരു പരീക്ഷാ ആർക്കിടെക്ചർ രൂപകല്പന ചെയ്യുക എന്നതാണ് അദ്ദേഹത്തിന്റെ ദൗത്യം.
എസ് സോമനാഥ്
നന്ദൻ നിലേക്കനി ഡിജിറ്റൽ അടിസ്ഥാന സൗകര്യങ്ങളെയാണ് പ്രതിനിധീകരിക്കുന്നതെങ്കിൽ, മുൻ ഐഎസ്ആർഒ മേധാവി എസ് സോമനാഥ് പ്രതിനിധീകരിക്കുന്നത് 'പ്രവർത്തന കൃത്യതയെയാണ്'.
എസ് സോമനാഥിന്റെ വൈദഗ്ദ്ധ്യം കേവലം റോക്കറ്റുകളിൽ മാത്രം ഒതുങ്ങുന്നതല്ല. ഐഎസ്ആർഒയിലെ സേവനകാലയളവിൽ, കൃത്യമായ ആസൂത്രണം, അപകടസാധ്യതകൾ മുൻകൂട്ടി വിലയിരുത്തൽ, വിവിധ ഏജൻസികളെയും സംഘങ്ങളെയും ഏകോപിപ്പിച്ചു കൊണ്ടുള്ള സുഗമമായ പ്രവർത്തനം തുടങ്ങി ഇന്ത്യയുടെ ഏറ്റവും സങ്കീർണ്ണമായ പല സാങ്കേതിക പദ്ധതികൾക്കും അദ്ദേഹം മേൽനോട്ടം വഹിച്ചിട്ടുണ്ട്. ദശലക്ഷക്കണക്കിന് വിദ്യാർഥികളും ആയിരക്കണക്കിന് പരീക്ഷാ കേന്ദ്രങ്ങളും ഉൾപ്പെടുന്ന, വളരെ കൃത്യതയോടെ ഏകോപിപ്പിക്കേണ്ട അഖിലേന്ത്യാ പരീക്ഷകളുടെ നടത്തിപ്പിനും മേൽപ്പറഞ്ഞ ഇതേ മികവുകൾ തന്നെയാണ് ആവശ്യം.
പിഴവുകളില്ലാത്ത പ്രക്രിയകൾക്കും സൈബർ ഇന്റലിജൻസിനും അദ്ദേഹത്തിന്റെ സഹായം ലഭ്യമാകും. ബഹിരാകാശ ദൗത്യങ്ങളുടെ അതേ മാതൃകയിൽ പരീക്ഷകൾ നടത്തുന്നതിനായി കൂടുതൽ സുരക്ഷാ സംവിധാനങ്ങളും 'സീറോ-ഡിഫെക്റ്റ്' മാനദണ്ഡങ്ങളും വികസിപ്പിച്ചെടുക്കാൻ ഇതിലൂടെ സാധിക്കും.
ചോദ്യപ്പേപ്പർ തയ്യാറാക്കുന്നത് മുതൽ ഫലപ്രഖ്യാപനം വരെയുള്ള ഓരോ ഘട്ടത്തിലും ബഹുതല പരിശോധനകൾ ഉറപ്പാക്കാൻ ഇത് സഹായിക്കും. ഇതുവഴി മനുഷ്യസഹജമായ പിഴവുകളോ സാങ്കേതിക തകരാറുകളോ ഉണ്ടാകാനുള്ള സാധ്യത പരമാവധി കുറയ്ക്കാനാകും. ഇതിലൂടെ നൽകുന്ന സന്ദേശം വളരെ വ്യക്തമാണ്, പരീക്ഷാ നടത്തിപ്പിനെ കേവലമൊരു ഭരണപരമായ പ്രക്രിയ എന്നതിലുപരി, കൃത്യമായ പരിഹാരം ആവശ്യമുള്ള ഒരു എൻജിനീയറിങ് പ്രശ്നമായാണ് സർക്കാർ ഇപ്പോൾ കാണുന്നത്.
മൂല്യനിർണയ രീതി തന്നെ മാറ്റിയെഴുതാൻ ഒരു ഐഐടി ഡയറക്ടർ
പരീക്ഷാ മാതൃക ദുർബലമായി തുടരുകയാണെങ്കിൽ, സാങ്കേതികവിദ്യയ്ക്ക് മാത്രം ജനങ്ങളുടെ വിശ്വാസം വീണ്ടെടുക്കാനാകില്ല. കമ്പ്യൂട്ടർ ആർക്കിടെക്ചർ, ആർട്ടിഫിഷ്യൽ ഇന്റലിജൻസ്, സൈബർ സെക്യൂരിറ്റി എന്നീ മേഖലകളിൽ പ്രവർത്തിക്കുന്ന കമ്പ്യൂട്ടർ സയന്റിസ്റ്റും മദ്രാസ് ഐഐടി ഡയറക്ടറുമായ വി കാമകോടിയെ സമിതിയിൽ ഉൾപ്പെടുത്തിയത് ഇതുകൊണ്ടാണ്.
ഡിജിറ്റൽ അടിസ്ഥാന സൗകര്യങ്ങളിൽ മാത്രം ശ്രദ്ധ കേന്ദ്രീകരിക്കുന്ന സാങ്കേതിക വിദഗ്ധരിൽ നിന്ന് വ്യത്യസ്തമായി, എൻജിനീയറിങ് വിദ്യാഭ്യാസം, അക്കാദമിക് ഭരണം, സുരക്ഷിതമായ കമ്പ്യൂട്ടിങ് എന്നീ മേഖലകളിൽ പതിറ്റാണ്ടുകളുടെ അനുഭവസമ്പത്തുമായാണ് അദ്ദേഹത്തിന്റെ വരവ്. പരീക്ഷകൾ ചോർച്ചരഹിതമാക്കുക എന്നതിനപ്പുറം, മൂല്യനിർണ്ണയ രീതികൾ എങ്ങനെ രൂപകല്പന ചെയ്യണം, എങ്ങനെ നടത്തണം, എങ്ങനെ വിലയിരുത്തണം എന്നിവയെക്കുറിച്ച് അടിസ്ഥാനപരമായി പുനർവിചിന്തനം ചെയ്യുക എന്നതാണ് അദ്ദേഹത്തിന്റെ ദൗത്യം.
പരീക്ഷകളിലെ സാങ്കേതിക വെല്ലുവിളികൾ പരിഹരിക്കുന്നതിൽ കാമകോടി ഇതിനകം തന്നെ നിർണായക പങ്ക് വഹിച്ചിട്ടുണ്ട്. ഈ വർഷം ആദ്യം സിബിഎസ്ഇയുടെ ഓൺ-സ്ക്രീൻ മാർക്കിങ് പോർട്ടലിലെ തകരാറുകൾ പരിശോധിച്ച് സിസ്റ്റം കൂടുതൽ മികച്ചതാക്കുന്നതിനുള്ള നടപടികൾ നിർദ്ദേശിക്കാൻ കേന്ദ്ര വിദ്യാഭ്യാസ മന്ത്രാലയം ചുമതലപ്പെടുത്തിയത് ഐഐടി മദ്രാസിലെ വിദഗ്ധരെയായിരുന്നു.
വരാനിരിക്കുന്ന പരീക്ഷാ പരിഷ്കാരങ്ങൾ ഏത് ദിശയിലായിരിക്കും എന്നതിനെക്കുറിച്ച് അദ്ദേഹം ഇതിനകം തന്നെ ചില സൂചനകൾ നൽകിയിട്ടുണ്ട്. സാങ്കേതികവിദ്യ കേവലം ചോദ്യപ്പേപ്പർ ചോർച്ച തടയുക മാത്രമല്ല വേണ്ടതെന്നും, മറിച്ച് പരീക്ഷാ പ്രക്രിയ കൂടുതൽ സുതാര്യമാക്കുക കൂടിയാണ് വേണ്ടതെന്നും അദ്ദേഹം വാദിക്കുന്നു.
കൃത്യമായ ഉത്തരവാദിത്തമില്ലാതെ സാങ്കേതികവിദ്യയ്ക്ക് വിജയിക്കാനാകില്ലെന്നും അദ്ദേഹം ഊന്നിപ്പറയുന്നു. കാമകോടിയുടെ അഭിപ്രായത്തിൽ, ചോദ്യപ്പേപ്പർ തയ്യാറാക്കുന്നവർ മുതൽ പരീക്ഷാ നടത്തിപ്പുകാർ, മൂല്യനിർണ്ണയം നടത്തുന്നവർ, ഫലം തയ്യാറാക്കുന്നവർ തുടങ്ങി ഓരോരുത്തർക്കും വ്യക്തമായി നിർവചിക്കപ്പെട്ട ഉത്തരവാദിത്തങ്ങൾ ഉണ്ടായിരിക്കണം. എങ്കിൽ മാത്രമേ മുഴുവൻ പരീക്ഷാ സംവിധാനവും സുതാര്യവും, വീഴ്ചകളില്ലാത്തതും, ഉത്തരം പറയാൻ ബാധ്യതയുള്ളതുമായി മാറുകയുള്ളൂ. പരീക്ഷകളുടെ സുരക്ഷ ഉറപ്പാക്കുന്നതിൽ മാത്രമല്ല കർമ്മസേന ശ്രദ്ധ കേന്ദ്രീകരിക്കുക. മറിച്ച് വിദ്യാർഥികൾക്കുള്ള സുതാര്യത, സ്ഥാപനങ്ങളുടെ ഉത്തരവാദിത്തം എന്നീ രണ്ട് പ്രധാന തത്വങ്ങളെ അടിസ്ഥാനമാക്കി പരീക്ഷാ സംവിധാനത്തെ തന്നെ പൂർണ്ണമായി ഉടച്ചുവാർക്കാനാകും സമിതി ശ്രമിക്കുക.
കോപ്പിയടി മാഫിയകളെ നേരിടാൻ സുരക്ഷാ വിദഗ്ധർ
ഇന്നത്തെ കാലത്തെ പരീക്ഷാ തട്ടിപ്പുകൾ പഴയതുപോലെ കടലാസിൽ ഉത്തരങ്ങൾ എഴുതിക്കൊണ്ടുവരുന്ന രീതികളല്ല. ചോദ്യപ്പേപ്പർ ചോർച്ചയ്ക്ക് പിന്നിൽ ഇപ്പോൾ പ്രവർത്തിക്കുന്നത് സംസ്ഥാനങ്ങളിലുടനീളം വേരുകളുള്ള സംഘടിത ശൃംഖലകളാണ്. എൻക്രിപ്റ്റഡ് സന്ദേശങ്ങളും, ആൾമാറാട്ടവും തുടങ്ങി അത്യാധുനികവും സങ്കീർണ്ണവുമായ മാർഗ്ഗങ്ങളാണ് ഇവർ ഉപയോഗിക്കുന്നത്.
ഇന്ത്യയിലെ ഏറ്റവും പരിചയസമ്പന്നരായ ഇന്റലിജൻസ് ഉദ്യോഗസ്ഥരിൽ ഒരാളായ ഇന്റലിജൻസ് ബ്യൂറോ ഡയറക്ടർ തപൻ ഡെക്കയെ കർമ്മസേനയിൽ ഉൾപ്പെടുത്തിയത് ഈ കാരണത്താലാണ്. ചോദ്യപ്പേപ്പർ ചോർച്ചയെ ഒറ്റപ്പെട്ട സംഭവങ്ങളായോ വെറുമൊരു കോപ്പിയടിയായോ അല്ല സർക്കാർ ഇപ്പോൾ കാണുന്നത്, മറിച്ച്, രഹസ്യാന്വേഷണവും, ഭീഷണികൾ മുൻകൂട്ടി വിലയിരുത്തലും, ശക്തമായ പ്രതിരോധ നടപടികളും ആവശ്യമായ വലിയൊരു സുരക്ഷാ വെല്ലുവിളിയായാണ് കണക്കാക്കുന്നത് എന്നാണ് അദ്ദേഹത്തിന്റെ സാന്നിധ്യം വ്യക്തമാക്കുന്നത്.
പരീക്ഷകളുടെ വിശ്വാസ്യത വീണ്ടെടുക്കണമെങ്കിൽ, സാങ്കേതികമായ സുരക്ഷാ സംവിധാനങ്ങൾക്കൊപ്പം തന്നെ ഇത്തരം കോപ്പിയടി മാഫിയകൾക്ക് മേൽ ശക്തമായ നിരീക്ഷണവും ആവശ്യമാണെന്ന് ഒരു ഇന്റലിജൻസ് പ്രൊഫഷണലിനെ സമിതിയിൽ കൊണ്ടുവന്നതിലൂടെ കേന്ദ്ര സർക്കാർ അംഗീകരിക്കുകയാണ്.
സിസ്റ്റത്തെ തിരുത്താൻ വിദ്യാഭ്യാസ വിദഗ്ധർ
സാങ്കേതികവിദ്യയ്ക്ക് പരീക്ഷാ സംവിധാനങ്ങളെ ശക്തിപ്പെടുത്താൻ കഴിഞ്ഞേക്കാം, എന്നാൽ മികച്ച വിദ്യാഭ്യാസ ഭരണനിർവഹണത്തിന് പകരമാകാൻ ഒരിക്കലും അതിന് കഴിയില്ല. മുൻ വിദ്യാഭ്യാസ സെക്രട്ടറിയായ അനിതാ കർവാളിന്റെ സാന്നിധ്യം ഇവിടെയാണ് നിർണായകമാകുന്നത്.
സ്കൂൾ വിദ്യാഭ്യാസം, പരീക്ഷാ നടത്തിപ്പ്, നയരൂപീകരണം എന്നീ മേഖലകളിൽ പതിറ്റാണ്ടുകളുടെ അനുഭവസമ്പത്തുമായാണ് അവർ സമിതിയിലെത്തുന്നത്. വിദ്യാഭ്യാസ മേഖലയിൽ മുൻപ് പല വലിയ പരിഷ്കാരങ്ങൾക്കും നേതൃത്വം നൽകിയിട്ടുള്ള അവർ, സമിതി നിർദ്ദേശിക്കുന്ന സാങ്കേതിക മാറ്റങ്ങൾ ഇന്ത്യയുടെ വിശാലമായ വിദ്യാഭ്യാസ ചട്ടക്കൂടിന് അനുയോജ്യമാണെന്ന് ഉറപ്പാക്കാൻ സഹായിക്കും.
പുതിയ പരിഷ്കാരങ്ങൾ കേവലം സാങ്കേതികവിദ്യാ കമ്പനികൾക്ക് മാത്രം ഒതുങ്ങുന്നതാകരുത്, മറിച്ച് അത് വിദ്യാർഥികൾക്കും സ്കൂളുകൾക്കും പരീക്ഷാ ബോർഡുകൾക്കും സർവകലാശാലകൾക്കും ഒരുപോലെ പ്രായോഗികവും ഗുണകരവുമായിരിക്കണം എന്ന് സർക്കാർ തിരിച്ചറിയുന്നു എന്നതിന്റെ തെളിവ് കൂടിയാണ് സമിതിയിലുള്ള അവരുടെ സാന്നിധ്യം.
രാജ്യവ്യാപകമായ ദൗത്യത്തിന് ഒരു ലോജിസ്റ്റിക്സ് വിദഗ്ദ്ധൻ
ഇന്ത്യയിലെ തന്നെ ഏറ്റവും വലിയ ലോജിസ്റ്റിക് ദൗത്യങ്ങളിൽ ഒന്നാണ് രാജ്യവ്യാപകമായി പരീക്ഷകൾ സംഘടിപ്പിക്കുക എന്നത്. ദശലക്ഷക്കണക്കിന് വിദ്യാർഥികൾ ഒരേദിവസം പരീക്ഷയെഴുതുമ്പോൾ, ചോദ്യപ്പേപ്പറുകൾ സുരക്ഷിതമായി ലക്ഷ്യസ്ഥാനത്ത് എത്തിക്കുക, വിവിധ സംസ്ഥാനങ്ങളിലെ പരീക്ഷാ കേന്ദ്രങ്ങൾ ഏകോപിപ്പിക്കുക, ഉദ്യോഗസ്ഥരെ വിന്യസിക്കുക, ആവശ്യമായ സാമഗ്രികൾ എത്തിക്കുക, അടിയന്തര സാഹചര്യങ്ങളെ നേരിടാനുള്ള പദ്ധതികൾ തയ്യാറാക്കുക തുടങ്ങി വലിയൊരു അധ്വാനം ഇതിന് പിന്നിലുണ്ട്.
വൻകിട അടിസ്ഥാന സൗകര്യ വികസന പദ്ധതികളും ഭരണനിർവഹണ ചുമതലകളും കൈകാര്യം ചെയ്ത് പരിചയമുള്ള മുതിർന്ന സിവിൽ സർവീസ് ഉദ്യോഗസ്ഥനായ അമൃത് ലാൽ മീണയെ കർമ്മസേനയിൽ ഉൾപ്പെടുത്തിയത് ഈയൊരു പശ്ചാത്തലത്തിലാണ്.
സാങ്കേതികവിദ്യയുടെ പോരായ്മകൾ കൊണ്ടല്ലാതെ, ആസൂത്രണത്തിലെ പാളിച്ചകൾ കൊണ്ട് പരീക്ഷാ നടത്തിപ്പിൽ ഉണ്ടാകുന്ന വീഴ്ചകൾ പരമാവധി കുറയ്ക്കാൻ അദ്ദേഹത്തിന്റെ വൈദഗ്ദ്ധ്യം സഹായിക്കും. പരീക്ഷാ സംവിധാനത്തിലുടനീളം മികച്ച ഏകോപനവും, നടത്തിപ്പും, പ്രവർത്തനക്ഷമതയും ഉറപ്പാക്കാൻ ഇതിലൂടെ സാധിക്കുമെന്നാണ് സർക്കാരിന്റെ വിലയിരുത്തൽ.
ഇന്ത്യയുടെ പരീക്ഷാ സംവിധാനത്തിന് എവിടെയാണ് പിഴച്ചതെന്ന് സർക്കാർ കരുതുന്നു എന്നതിന്റെ വ്യക്തമായ രൂപരേഖയാണ് ഈ കർമ്മസേനയുടെ ഘടന പരിശോധിച്ചാൽ മനസ്സിലാകുന്നത്. വിദ്യാഭ്യാസ ഭരണാധികാരികളെ മാത്രം ആശ്രയിക്കുന്നതിനുപകരം, സാങ്കേതികവിദ്യ, ശാസ്ത്രം, സുരക്ഷ, വിദ്യാഭ്യാസം, പബ്ലിക് അഡ്മിനിസ്ട്രേഷൻ എന്നീ മേഖലകളിൽ നിന്നുള്ള വിദഗ്ധരെയാണ് ഇതിനായി ഒന്നിപ്പിച്ചിരിക്കുന്നത്. ഓരോരുത്തരെയും തിരഞ്ഞെടുത്തിരിക്കുന്നത് പരീക്ഷാ സംവിധാനത്തിലെ ഓരോ പ്രത്യേക വീഴ്ചകൾ പരിഹരിക്കാനാണെന്ന് വ്യക്തം.
The Indian government has formed a high-profile seven-member task force to fundamentally restructure the country's public examination system and eliminate paper leaks. Rather than relying solely on traditional education administrators, the panel brings together top experts from technology, space science, cybersecurity, intelligence, and logistics. The composition of this task force signals a major diagnostic shift by the government. The examination crisis is no longer being treated as a simple administrative problem or a series of isolated cheating incidents. Instead, the government is treating it as a complex engineering and security challenge that requires a multi-layered, resilient system to fully restore public trust.