കാവിവേഷം അഴിക്കാത്ത അണ്ണാമലൈ; വരാനിരിക്കുന്നത് ബിജെപിയുടെ അനുബന്ധ പാർട്ടിയെന്ന നാടകം? ലക്ഷ്യം ദ്രാവിഡ മനസിലേക്കുള്ള കുറുക്കുവഴി?

തമിഴ്നാട്ടിൽ ബി.ജെ.പിയുടെ ടർബോ ചാർജ്ഡ് എൻജിനായിരുന്നു അണ്ണാമലൈ. ഹിന്ദുത്വ അജണ്ടകൾ അത്രകണ്ട് വേരുപിടിക്കാത്ത തമിഴ്നാട്ടിൽ സർവവും സമർപ്പിച്ച് പണിയെടുത്തിട്ടുണ്ട് അദ്ദേഹം. ഒടുവിൽ കാവിവേഷം അഴിക്കാതെ തന്നെ പടിയിറങ്ങുകയും ചെയ്തു. അഭിപ്രായവ്യത്യാസങ്ങൾ, ആശയപരമായതിനേക്കാൾ തന്ത്രപരമായ കാര്യങ്ങളിലായിരുന്നു.

അതുകൊണ്ടുതന്നെയാണ്, ദേശീയതയിൽ പൊതിഞ്ഞ വികസന അജണ്ടയ്ക്ക് വേണ്ടത്ര മുന്നേറ്റം നേടാനാകാത്ത ഒരു സംസ്ഥാനത്തിൽ, ഒരു അനുബന്ധ മാതൃക പരീക്ഷിക്കാനുള്ള അവസരം ബിജെപിക്ക് തുറന്നുകിട്ടുന്നത്. ഡബിൾ എഞ്ചിൻ സർക്കാർ എന്ന ലക്ഷ്യത്തിനായി, തികച്ചും വ്യത്യസ്തമായ ഒരു സ്വത്വമുള്ള, എന്നാൽ പൂർണമായും സ്വന്തം നിയന്ത്രണത്തിലുള്ള ഒരു രാഷ്ട്രീയ അനുബന്ധ പാർട്ടി. അതാവാം അണ്ണാമലൈയുടെയും ബി.ജെ.പിയുടെയും ലക്ഷ്യം.

ബി.ജെ.പിയുടെ അവിഭാജ്യഘടകമാണ് അണ്ണാമലൈ. കാലങ്ങളോളം കഷ്ടപ്പെട്ട് അയാൾ പണിതുയർത്തിയ പാലത്തിന്മേലാണ് തമിഴ്നാട്ടിൽ ബി.ജെ.പിയുടെ നിലനിൽപും. അതുകൊണ്ടു തന്നെ അണ്ണൈമലൈയിലൂടെ മാത്രമേ തമിഴ്നാട്ടിൽ വേരുറപ്പിക്കാൻ ബി.ജെ.പിക്ക് സാധിക്കൂ. ഒരമ്മ പെറ്റ രണ്ടുമക്കളായി അവർക്ക് തുടർന്നേ പറ്റൂ.

21 സംസ്ഥാനങ്ങളിലും കേന്ദ്രത്തിലും ഭരണത്തിന്റെ ഭാഗമായതോടെ, ബിജെപിയുടെ രാഷ്ട്രീയ സാന്നിധ്യം ഇപ്പോൾ ഇന്ദിരാ ഗാന്ധിയുടെ കാലത്ത് കോൺഗ്രസിനുണ്ടായിരുന്ന ഉന്നതകാല സ്വാധീനത്തിന് സമാനമായ നിലയിലെത്തിയിട്ടുണ്ട്. എന്നിരുന്നാലും, തമിഴ്നാട്, കേരളം, പഞ്ചാബ് തുടങ്ങിയ സംസ്ഥാനങ്ങളിൽ സ്വതന്ത്രമായി ശക്തമായ അടിത്തറ സൃഷ്ടിക്കാൻ ബിജെപിക്ക് ഇതുവരെ കഴിഞ്ഞിട്ടില്ല.

ഹിന്ദി-ഹിന്ദുത്വ സ്വത്വം ബിജെപിയുമായി ശക്തമായി ബന്ധിപ്പിക്കപ്പെട്ടിരിക്കുന്നതാണ് അതിന് പ്രധാനകാരണം. ദേശീയതയും വികസനവും മുൻനിർത്തിയുള്ള ആ രാഷ്ട്രീയ അജണ്ട, സങ്കീർണമായ സാമൂഹിക സാഹചര്യങ്ങളും ശക്തമായ പ്രാദേശിക ഉപദേശീയതയും നിലനിൽക്കുന്ന സംസ്ഥാനങ്ങളിൽ അത്ര ഫലപ്രദമായി പ്രവർത്തിക്കുന്നില്ല.

ഹിന്ദി-ഹിന്ദുത്വ സ്വത്വം പെട്ടെന്നൊരുനാൾ ആവാഹിക്കുന്ന ജനതയല്ല തമിഴ്നാട്ടിലേത്. അതിന് അണ്ണാമലൈയെ പോലൊരാൾ അവിടെ വേണം. ബി.ജെ.പിയുടെ പ്രത്യയശാസ്ത്രത്തിന് സമാനമായി, എന്നാൽ ദ്രാവിഡമനസ്സുകളെ കയ്യിലെടുക്കാൻ തക്കവണ്ണം ഒരു റീബ്രാൻഡിംഗ് അണ്ണാമലൈയുടെയും ബി.ജെ.പിയുടെയും ആവശ്യമായി കഴിഞ്ഞിരിക്കുന്നു.

ഒരു ദേശീയ പാർട്ടിക്ക് സ്വന്തം ദേശീയ വിശ്വാസ്യതയ്ക്ക് മങ്ങലേൽപ്പിക്കാതെ പ്രാദേശിക ഉപദേശീയതയെ പൂർണമായി ഉൾക്കൊള്ളുക എളുപ്പമല്ല. ഒരു രാജ്യം, ഒരു തിരഞ്ഞെടുപ്പ് എന്ന ആശയത്തെ ബിജെപി പിന്തുണച്ചേക്കാം. എന്നാൽ ഭാഷാടിസ്ഥാനത്തിൽ സംസ്ഥാനങ്ങൾ രൂപീകരിക്കപ്പെട്ടതും പ്രാദേശിക ആവശ്യങ്ങളാൽ നിരന്തരം പുതിയ രാഷ്ട്രീയ പാർട്ടികളുണ്ടാകുന്നതുമായ ഇന്ത്യയിൽ ഒരു രാജ്യം, ഒരു രാഷ്ട്രീയം എന്ന സമീപനം പ്രായോഗികമല്ല.

അതുകൊണ്ടുതന്നെ അണ്ണാമലൈ അദ്ദേഹത്തിന്റെ വഴിക്ക് നീങ്ങട്ടെ എന്ന സമീപനമാവും ബിജെപി സ്വീകരിക്കുക. ആവശ്യമുള്ളപ്പോൾ മാത്രം പിന്തുണ നൽകി, ഒരു കൈയകലത്തിൽ നിർത്തി, ബി ടീം എന്ന പേരുകേൾപ്പിക്കാതിരിക്കുക. ഇതേ സമീപനം തന്നെയാവും കേരളത്തിലും, തമിഴ്നാട്ടിലും ബിജെപി പയറ്റുക.

പഞ്ചാബിന്റെ കാര്യത്തിൽ, ജാട്ട് സമുദായത്തിന് പുറത്തുള്ള വിഭാഗങ്ങളെ കേന്ദ്രീകരിച്ചുള്ള സാമൂഹിക എഞ്ചിനീയറിങ് തന്ത്രമാണ് ബിജെപി പരീക്ഷിക്കുന്നത്. പശ്ചിമബംഗാളിൽ ഉപദേശീയതയെ മറികടക്കുന്നത് എത്ര ദുഷ്കരമാണെന്ന് ബിജെപി നേരിട്ട് അനുഭവിച്ചറിഞ്ഞിട്ടുണ്ട്. മത്സ്യം പോലുള്ള ഒരു ഭക്ഷണവിഷയം പോലും അവിടെ രാഷ്ട്രീയമായി വലിയ സ്വാധീനം ചെലുത്തുമെന്ന് ബിജെപി തിരിച്ചറിയുകയും ചെയ്തു.

തമിഴ്നാട് ബിജെപി അധ്യക്ഷനായിരിക്കെ, അണ്ണാമലൈ പാർട്ടിയുടെ അടിത്തറ ശക്തിപ്പെടുത്താൻ ഘട്ടംഘട്ടമായുള്ള ശ്രമങ്ങളാണ് നടത്തിയത്. ബിജെപിയുടെ ജനകീയ പിന്തുണ വർധിപ്പിക്കാൻ 1,700 കിലോമീറ്റർ ദൈർഘ്യമുള്ള "എൻ മൺ, എൻ മക്കൾ" പദയാത്ര നടത്തി. തമിഴ്നാട്ടിലെ 39 ലോക്‌സഭാ മണ്ഡലങ്ങളിലൂടെയും കടന്നുപോയ ഈ യാത്ര ബി.ജെ.പിക്ക് വലിയ മുതൽക്കൂട്ടായിരുന്നു.

പുല്ല് വേരുറക്കാൻ സമയമെടുക്കുമെങ്കിലും ഒടുവിൽ അത് വേരുറയ്ക്കും എന്നതുപോലെ, 2024 ലോക്‌സഭാ തിരഞ്ഞെടുപ്പിൽ ബിജെപിയുടെ വോട്ടുശതമാനം ഏകദേശം 3 ശതമാനത്തിൽ നിന്ന് 11 ശതമാനത്തിലേറെയായി ഉയർന്നു.

എന്നാൽ തമിഴ്നാട്ടിൽ അധികാരം പിടിക്കാനുള്ള ആഗ്രഹത്തിൽ, 2026 തിരഞ്ഞെടുപ്പിനായി ബിജെപി തന്റെ പഴയ ദ്രാവിഡ സഖ്യകക്ഷിയായ എഐഎഡിഎംകെയുമായി വീണ്ടും കൈകോർക്കാൻ തീരുമാനിച്ചു. അതിന്റെ അനൗദ്യോഗിക ഉപാധിയായി, അണ്ണാമലൈ 2025-ൽ സംസ്ഥാന അധ്യക്ഷ സ്ഥാനം ഒഴിഞ്ഞു. തുടർന്ന് ബിജെപിയുടെ വോട്ടുശതമാനം വീണ്ടും 3 ശതമാനത്തിന് താഴെയായി.

ഇപ്പോൾ ബിജെപിക്ക് എഐഎഡിഎംകെയുമായി സഖ്യത്തിൽ തുടരാം. അതേസമയം, അണ്ണാമലൈക്ക് സ്വന്തം പാർട്ടി രൂപീകരിച്ച്, മുമ്പ് ചെയ്തതുപോലെ ദ്രാവിഡ മുന്നേറ്റ കഴകവും എഐഎഡിഎംകെയും ഉൾപ്പെടുന്ന ദ്രാവിഡ രാഷ്ട്രീയ ശക്തികളെ നേരിടുകയുമാവാം.

കൂടാതെ, ആർഎസ്എസിന്റെ നിശ്ശബ്ദ പിന്തുണ ലഭിച്ചാൽ, അണ്ണാമലൈ വിജയയ്ക്ക് പ്രധാന വെല്ലുവിളിയായി ഉയർന്നുവരാനും സാധ്യതയുണ്ടെന്നാണ് രാഷ്ട്രീയനിരൂപകർ ചൂണ്ടിക്കാട്ടുന്നത്.

ബിജെപിക്കും ഇതിൽ നേട്ടമുണ്ടാകും. പാർലമെന്റിൽ ഓരോ വോട്ടും നിർണായകമാകുന്ന സാഹചര്യങ്ങളിൽ, ദേശീയ പ്രാധാന്യമുള്ള വിഷയങ്ങളിൽ പിന്തുണ ഉറപ്പാക്കാൻ ഈ നീക്കത്തിലൂടെ ബിജെപിക്ക് സാധിക്കും. ബിജു ജനതാദളുമായുള്ള ബന്ധം അതിനുദ്ദാഹരണമാണ്. ബിജെപിയുടെ അനുബന്ധ പാർട്ടി അല്ലാതിരുന്നിട്ടും, നവീൻ പട്നായിക്കിന്ർറെ നേതൃത്വത്തിലുള്ള ബിജു ജനതാദൾ പല നിർണായക വിഷയങ്ങളിലും പാർലമെന്റിൽ ബിജെപിക്ക് പിന്തുണ നൽകിയിരുന്നു.

അതുപോലെ, ഇതിനകം നേടിയ രാഷ്ട്രീയ നേട്ടങ്ങൾ സംരക്ഷിക്കുന്നതിലും ബിജെപിക്ക് കൂടുതൽ ശ്രദ്ധ കേന്ദ്രീകരിക്കാൻ കഴിയും. അണ്ണാമലൈയുടെ പാർട്ടി പോലുള്ള പ്രാദേശിക ശക്തികൾ സംസ്ഥാനങ്ങളിൽ ജയിക്കാൻ ശ്രമിക്കുമ്പോൾ, ബിജെപിക്ക് തങ്ങൾ ഇതിനകം ശക്തമായിരിക്കുന്ന മേഖലകളിൽ പിടിമുറുക്കാം.

അതിനാൽ, അണ്ണാമലൈ ഒറ്റയ്ക്ക് രാഷ്ട്രീയ യാത്ര നടത്തുന്നതിൽ ബിജെപി അസ്വസ്ഥരാകേണ്ട കാര്യമില്ലെന്നാണ് നിഗമനം. സംസ്ഥാനങ്ങളിൽ ഡബിൾ എഞ്ചിൻ സർക്കാർ എന്ന ലക്ഷ്യം കൈവരിക്കാൻ, ഒരു അനുബന്ധ രാഷ്ട്രീയ മാതൃക പരീക്ഷിക്കേണ്ട സമയം ബിജെപിക്ക് വന്നിട്ടുണ്ടെന്നാണ് വിലയിരുത്തൽ.

English Summary: Annamalai was the BJP's turbocharged engine in Tamil Nadu. In a state where Hindutva politics has struggled to take deep root, he worked tirelessly and devoted himself fully to the party's cause. Yet, he stepped down without shedding the saffron mantle.

The differences appeared to be more strategic than ideological. That is precisely why the BJP now has an opportunity to experiment with a subsidiary model in a state where its nationalism-development agenda has not gained enough traction. The idea would be to create a politically distinct entity with its own identity, yet one that remains fully aligned with the BJP's broader objectives, helping achieve the goal of a "double-engine" government.

That, perhaps, could be the shared objective of both Annamalai and the BJP.