പ്രസംഗത്തിനിടയിൽ നാവുപിഴ; മാപ്പു പറഞ്ഞ് രൺബീർ കപൂർ

‘രാമായണ’ത്തിൽ ശ്രീരാമനായി വേഷമിടുന്ന ബോളിവുഡ് താരം രൺബീർ കപൂർ, നന്മയും തിന്മയും സംബന്ധിച്ച പ്രസ്താവനയിൽ സംഭവിച്ച നാവുപിഴയിൽ പരസ്യമായി മാപ്പുപറഞ്ഞു. തിന്മ എത്ര ശക്തമാണെങ്കിലും ഒടുവിൽ വിജയിക്കുക സത്യവും നന്മയുമാണെന്നു പറയാനായിരുന്നു ഉദ്ദേശിച്ചതെന്നും എന്നാൽ സംസാരത്തിനിടെ വാക്കുകൾ മാറിപ്പോയെന്നും താരം വ്യക്തമാക്കി. ഒക്ടോബർ 21-ന് ചെന്നൈയിൽ നടന്ന പരിപാടിയിലാണ് കൊൽക്കത്തയിലെ സംഭവത്തിൽ രൺബീർ ഖേദം പ്രകടിപ്പിച്ചത്.

ദസറ ആഘോഷങ്ങളുടെ ഭാഗമായി കൊൽക്കത്തയിലെ സെൻട്രൽ പാർക്കിൽ സംഘടിപ്പിച്ച പരിപാടിയിൽ പങ്കെടുക്കവെയായിരുന്നു രൺബീറിന്റെ പരാമർശം. സാൾട്ട് ലേക്ക് സാംസ്കൃതിക് സൻസദിന്റെ നേതൃത്വത്തിൽ നടന്ന ചടങ്ങിൽ നന്മയുടെ വിജയത്തെക്കുറിച്ച് സംസാരിക്കുകയായിരുന്നു താരം. എന്നാൽ, തിന്മ എത്ര ശക്തമായാലും അവസാനം സത്യവും നന്മയും അവസാനിക്കുമെന്ന അർഥം വരുന്ന രീതിയിലാണ് വാക്കുകൾ പുറത്തുവന്നത്.

പ്രസ്താവനയുടെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ വലിയ ചർച്ചകൾക്കു തുടക്കമായി. പ്രത്യേകിച്ച്, വരാനിരിക്കുന്ന ചിത്രത്തിൽ ശ്രീരാമനായി അഭിനയിക്കുന്ന താരത്തിൽനിന്ന് ഇത്തരമൊരു പരാമർശമുണ്ടായതിനെ ചിലർ വിമർശിച്ചു. വീഡിയോയ്ക്ക് പിന്നാലെ ട്രോളുകളും മീമുകളും വ്യാപകമായി പ്രചരിച്ചു.

ചെന്നൈയിലെ ചടങ്ങിൽ സംസാരിക്കവെ സംഭവത്തിൽ ഖേദം പ്രകടിപ്പിച്ച രൺബീർ, താൻ ഉദ്ദേശിച്ചത് എന്താണെന്നും വ്യക്തമാക്കി. തിന്മയ്ക്ക് എത്ര ശക്തിയുണ്ടെങ്കിലും ഒടുവിൽ സത്യവും നന്മയും തന്നെയാണ് വിജയിക്കുകയെന്ന സന്ദേശമാണ് നൽകാൻ ശ്രമിച്ചതെന്ന് താരം പറഞ്ഞു. സംസാരത്തിനിടെയുണ്ടായ നാവുപിഴയാണെന്നും അതിൽ ആത്മാർഥമായി ക്ഷമ ചോദിക്കുന്നുവെന്നും അദ്ദേഹം കൂട്ടിച്ചേർത്തു. വിശദീകരണത്തിനിടെ 2011-ൽ പുറത്തിറങ്ങിയ തന്റെ ചിത്രമായ ‘റോക്ക്സ്റ്റാർ’ലെ ഗാനവരികളും രൺബീർ പരാമർശിച്ചു. എ.ആർ. റഹ്മാൻ സംഗീതം നൽകിയ ചിത്രത്തിലെ “Jo bhi main kehna chahu, barbaad kare alfaz mere” എന്ന വരി ഉദ്ധരിച്ചുകൊണ്ടായിരുന്നു പ്രതികരണം. മനസ്സിലുള്ളത് പറയാൻ ശ്രമിക്കുമ്പോൾ വാക്കുകൾ തന്നെ കൈവിടുന്ന അവസ്ഥയെ സൂചിപ്പിക്കുന്ന ഈ വരികൾ തന്റെ സാഹചര്യവുമായി ബന്ധപ്പെടുത്തിയാണ് താരം സംസാരിച്ചത്.

ക്ഷമാപണത്തിന്റെ ദൃശ്യങ്ങളും സമൂഹമാധ്യമങ്ങളിൽ ശ്രദ്ധ നേടി. ചിലർ രൺബീറിന് പിന്തുണയുമായി എത്തിയപ്പോൾ മറ്റുചിലർ അദ്ദേഹത്തിന്റെ പ്രതികരണത്തെക്കുറിച്ച് വിമർശനങ്ങളും ഉന്നയിച്ചു. ‘രാമായണ’ത്തിന്റെ പ്രചാരണത്തിനിടെ വിവാദം നിതേഷ് തിവാരി സംവിധാനം ചെയ്യുന്ന ‘രാമായണം’ രണ്ട് ഭാഗങ്ങളായാണ് ഒരുങ്ങുന്നത്. ചിത്രത്തിൽ ശ്രീരാമനായി രൺബീർ കപൂറും സീതയായി സായ് പല്ലവിയുമാണ് അഭിനയിക്കുന്നത്. യഷ്, അരുണ്‍ ഗോവിൽ, ലാറ ദത്ത, രവി ദുബെ, രാകുൽ പ്രീത് സിങ്, വിവേക് ഒബ്‌റോയ് എന്നിവരും ചിത്രത്തിന്റെ ഭാഗമാണ്.

ഇന്ത്യൻ ഇതിഹാസത്തെ ആസ്പദമാക്കി വൻ ബജറ്റിൽ ഒരുക്കുന്ന ചിത്രത്തിനായി ഏറെ പ്രതീക്ഷയോടെയാണ് പ്രേക്ഷകർ കാത്തിരിക്കുന്നത്. അതിനിടെയാണ് കൊൽക്കത്തയിലെ പരാമർശവും പിന്നാലെയുണ്ടായ വിശദീകരണവും വാർത്തകളിൽ ഇടംപിടിച്ചത്.