'കിങ് മേക്കർ അല്ലെങ്കിൽ കിങ്' വെള്ളിത്തിരയിൽ തിളങ്ങിയ വിജയ്യുടെ രാഷ്ട്രീയഭാവി എന്താകുമെന്നറിയാൻ മണിക്കൂറുകൾ മാത്രം ബാക്കി. ഒന്നോ രണ്ടോ എക്സിറ്റ് പോളുകൾ ഒഴിച്ച് എം കെ സ്റ്റാലിന്റെ ഡിഎംകെ വീണ്ടും അധികാരത്തിലെത്തുമെന്നാണ് പ്രവചനം. വിജയ് നേതൃത്വം നൽകുന്ന തമിഴക വെട്രി കഴകം (ടിവികെ) ഭൂരിപക്ഷം നേടുമെന്ന് ഒരു എക്സിറ്റ്പോൾ മാത്രമാണ് പറഞ്ഞിരിക്കുന്നത്. അതേസമയം, ടിവികെ നിർണായക ശക്തിയാവുമെന്ന് വിശ്വസിക്കുന്നവർ ഏറെയാണ്.
എംജിആറിന് ശേഷം മുഖ്യമന്ത്രി പദത്തിൽ തിളങ്ങുന്ന നടനെന്ന ഖ്യാതി വിജയ്ക്ക് ഉണ്ടാകുമെന്ന പ്രവചനവും നടന്നിട്ടുണ്ട്. എന്നാൽ, തമിഴ് സിനിമയിലെ സൂപ്പർതാരമായ വിജയ് രാഷ്ട്രീയത്തിലേക്ക് കടന്നതോടെ, അദ്ദേഹത്തിന്റെ ആദ്യ നിയമസഭാ തിരഞ്ഞെടുപ്പ് ഫലം ഒരു സാധാരണ വിജയ-പരാജയ കണക്കല്ല. അത് അദ്ദേഹത്തിന്റെ ഭാവി രാഷ്ട്രീയ ദിശ തന്നെ നിർണയിക്കുന്ന നിർണായക ഘടകമാകുകയാണ്.
ടി.വി.കെയിലൂടെ അരങ്ങേറ്റം കുറിച്ച വിജയ്, തമിഴ്നാട്ടിൽ ഡി.എം.കെയും എ.ഐ.എ.ഡി.എം.കെയും മാത്രമുള്ള രാഷ്ട്രീയ ആധിപത്യത്തിന് ഒരു ബദലായാണ് തന്നെ അവതരിപ്പിച്ചത്. രാഷ്ട്രീയമായി ഡി.എം.കെയ്ക്കും ആശയപരമായി ബിജെപിയ്ക്കും എതിരാണെന്നുള്ള നിലപാടും ടിവികെ സ്വതന്ത്ര രാഷ്ട്രീയ ശക്തിയായി ഉയർത്തിക്കാണിക്കാൻ സഹായകരമായി. ഇത് തമിഴ്നാടിന്റെ അധികാരം പിടിക്കാൻ വിജയ്യെ സഹായിക്കുമോ എന്നാണ് ഉയരുന്ന ചോദ്യം. തിരഞ്ഞെടുപ്പ് ഫലത്തിനുശേഷം വിജയിയുടെ ഭാവി മൂന്നു പ്രധാന സാധ്യതകളിലൂടെയാണ് രാഷ്ട്രീയ നിരീക്ഷകർ വിലയിരുത്തുന്നത്.
തൂക്കുമന്ത്രിസഭയിലെ ‘കിങ് മേക്കർ’ വിജയ്
ആർക്കും വ്യക്തമായ ഭൂരിപക്ഷമില്ലാതെ തൂക്കുസഭ ഉണ്ടായാൽ ടിവികെ നേടുന്ന സീറ്റുകൾ തമിഴ്നാട് രാഷ്ട്രീയത്തിൽ വിജയ് എന്ന നേതാവിന്റെ സ്വാധീനം ഉറപ്പിക്കും. ടിവികെയുടെ പിന്തുണ ഭരണത്തിൽ നിർണായകമാകും. ഡിഎംകെയോടോ അല്ലെങ്കിൽ എഐഎഡിഎംകെ–ബിജെപി സഖ്യത്തോടോ ചേർന്ന് സർക്കാർ രൂപീകരണത്തിൽ നിർണായക പങ്ക് വഹിക്കാൻ വിജയ്ക്കാകും.
മുഖ്യമന്ത്രി സ്ഥാനം മുതൽ, പ്രധാനപ്പെട്ട മന്ത്രിസ്ഥാനം, നയപരമായ ഉറപ്പുകൾ, പാർട്ടിയുടെ ദീർഘകാല വളർച്ചയ്ക്ക് ലഭിക്കുന്ന ഇടം തുടങ്ങിയവ തീരുമാനത്തിൽ നിർണായകമാകും. അധികാരം നേരിട്ടു കൈവശപ്പെടുത്താതെ തന്നെ സർക്കാർ രൂപീകരണവും നയദിശയും നിർണയിക്കുന്ന ശക്തിയാകാനും വിജയ്ക്കാകും.
ശക്തമായ മുന്നേറ്റത്തിൽ ‘കിങ്’ വിജയ്
ടിവികെ പ്രതീക്ഷിച്ചതിലും മികച്ച പ്രകടനം കാഴ്ചവെച്ച് വലിയ തോതിൽ സീറ്റുകൾ നേടിയാൽ, വിജയ് നേരിട്ട് അധികാരകേന്ദ്രത്തിലേക്ക് കടക്കാനുള്ള സാധ്യത ശക്തമാകും. അത്തരത്തിൽ, അദ്ദേഹം ‘കിങ് മേക്കർ’ എന്ന നിലയിൽ നിൽക്കാതെ ‘കിങ് ’ ആയി ഉയരാൻ ശ്രമിക്കും. മുഖ്യമന്ത്രിസ്ഥാനത്തെ ലക്ഷ്യമിടുന്ന നേതാവായി അദ്ദേഹത്തിന്റെ രാഷ്ട്രീയ ഇമേജ് കൂടുതൽ ഉറപ്പിക്കും.
താരാരാധനയിലൂടെ രൂപപ്പെട്ട വോട്ട് ബാങ്ക്, യുവജന പിന്തുണ, കൂടാതെ ഭരണമാറ്റം എന്ന വികാരം ഉയർന്നാൽ ഈ സാധ്യത കൂടുതൽ ശക്തമാകും. വലിയ സീറ്റുകൾ നേടിയാൽ, സഖ്യ രാഷ്ട്രീയത്തിലും അദ്ദേഹം മുൻനിര നിബന്ധനകൾ നിശ്ചയിക്കാൻ കഴിയുന്ന നിലയിലേക്ക് എത്തും. മുഖ്യമന്ത്രിസ്ഥാനം, പ്രധാന വകുപ്പുകൾ, നയപരമായ മുൻഗണനകൾ എന്നിവയിൽ നിർണായക സ്വാധീനം ചെലുത്താൻ കഴിയും. അതോടെ, സിനിമാതാരത്തിൽ നിന്ന് ഭരണനേതാവായി മാറുന്ന അദ്ദേഹത്തിന്റെ രാഷ്ട്രീയ യാത്ര പുതിയ ഘട്ടത്തിലേക്ക് കടക്കും.
തന്ത്രപരമായ കൂട്ടുകെട്ട്
ഭൂരിപക്ഷമില്ലാത്ത സാഹചര്യത്തിൽ വിജയ് ആരോടാണ് കൈകോർക്കുന്നത് എന്നതാണ് യഥാർത്ഥ ഗെയിം ചേഞ്ചർ. ഡി എം കെ യോടോ അല്ലെങ്കിൽ എ ഐ എ ഡി എം കെ –ബി ജെ പി സഖ്യത്തോടോ ചേർന്നാൽ അത് ആശയപരമായ നിലപാടുകളേക്കാൾ അധികാരത്തിലേക്കുള്ള ചുവടുവയ്പായിരിക്കും.
അതേസമയം, ഇത്തരം ഒരു നീക്കം വിജയിയുടെ രാഷ്ട്രീയ വിശ്വാസ്യതയ്ക്കുള്ള പരീക്ഷണവുമാകും. മുൻ നിലപാടുകൾക്ക് വിരുദ്ധമായി നീങ്ങിയാൽ വിമർശനം ഉയരാൻ സാധ്യതയുണ്ട്. മറിച്ച്, കൃത്യമായ നിബന്ധനകളോടെ സഖ്യം രൂപീകരിക്കുകയാണെങ്കിൽ അത് അദ്ദേഹത്തിന്റെ രാഷ്ട്രീയ പക്വത തെളിയിക്കുന്നതായി കാണപ്പെടും. അതുകൊണ്ട് തന്നെ, ഈ തീരുമാനമാണ് വിജയിയെ ഒരു സാധാരണ രാഷ്ട്രീയ കളിക്കാരനായി നിലനിർത്തുമോ, അല്ലെങ്കിൽ അധികാരത്തിന്റെ ദിശ നിർണയിക്കുന്ന നിർണായക ശക്തിയായി ഉയർത്തുമോ എന്നത് നിർണ്ണയിക്കുന്നത്.
രാഷ്ട്രീയ സമ്മർദങ്ങളും വെല്ലുവിളികളും
വിജയിയുടെ രാഷ്ട്രീയ പ്രവേശനം വലിയ ജനപിന്തുണയോടെയാണെങ്കിലും, അതിനൊപ്പമെത്തിയ വെല്ലുവിളികളും സമ്മർദ്ദങ്ങളും ചെറുതല്ല. 'ജനനായകൻ' റിലീസ് വൈകിയതും, കരൂർ ദുരന്തവും ഉൾപ്പെടെയുള്ള വിവാദങ്ങൾ, കേന്ദ്ര സർക്കാരുമായുള്ള രാഷ്ട്രീയ സംഘർഷങ്ങൾ എന്നിവ അദ്ദേഹത്തിന്റെ രാഷ്ട്രീയ പ്രവേശനത്തെ കൂടുതൽ സങ്കീർണമാക്കി.
എക്സിറ്റ് പോൾ പ്രതീക്ഷകൾ
ഡി എം കെ 122–132 സീറ്റുകളോടെ വ്യക്തമായ ഭൂരിപക്ഷം നേടുമെന്നാണ് മാട്രിസ് സർവ്വേ സൂചിപ്പിക്കുന്നത്. എ ഐ എ ഡി എം കെ –ബി ജെ പി സഖ്യം 87–100 സീറ്റുകളോടെ ശക്തമായ പോരാട്ടം കാഴ്ചവെക്കുമെന്നും റിപ്പോർട്ട് ഉണ്ട്. ടി വി കെ വലിയ തരംഗം സൃഷ്ടിക്കില്ലെന്നും 10–12 സീറ്റുകളിലൊതുങ്ങുമെന്നും കണക്കുകൾ പറയുന്നു.
അതേസമയം, ടൈംസ് നൗ എക്സിറ്റ് പോൾ എൻഡിഎയ്ക്ക് 128–147 സീറ്റുകൾ പ്രവചിച്ച് മുൻതൂക്കം നൽകുമ്പോൾ, ഡി എം കെ യ്ക്ക് 75–95 സീറ്റും ടി വി കെ -യ്ക്ക് 8–15 സീറ്റും ലഭിക്കാമെന്നാണ് അവരുടേതായ വിലയിരുത്തൽ. ആക്സിസ് മൈ ഇന്ത്യയുടെ കണക്കുകൾ പ്രകാരം ടി വി കെ വലിയ നേട്ടം നേടില്ലെങ്കിലും വിജയ് മത്സരിക്കുന്ന മണ്ഡലങ്ങളിൽ വിജയസാധ്യതയുണ്ടെന്നും പല മണ്ഡലങ്ങളിലും പാർട്ടി സ്വാധീനം ചെലുത്തുമെന്നും സൂചനയുണ്ട്. മൊത്തത്തിൽ, വോട്ടെടുപ്പിന് പിന്നാലെ വന്ന പ്രവചനങ്ങളെപ്പോലെ തന്നെ ഡി എം കെ -യ്ക്ക് വ്യക്തമായ ഭൂരിപക്ഷം ലഭിക്കുമെന്നതാണ് മിക്ക എക്സിറ്റ് പോളുകളും വ്യക്തമാക്കുന്നത്.
മുഖ്യമന്ത്രി ആരാകുമെന്നതിൽ കന്നിവോട്ടർമാരിൽ 68 ശതമാനവും വിജയിയെ പിന്തുണച്ചിരുന്നു. 37 ശതമാനം പേർ വിജയിയെ മുഖ്യമന്ത്രിയായി കാണാൻ ആഗ്രഹിക്കുമ്പോൾ, നിലവിലെ മുഖ്യമന്ത്രി എം.കെ. സ്റ്റാലിന് 35 ശതമാനം പേരുടെ പിന്തുണയുണ്ടെന്നും സർവേ വ്യക്തമാക്കി.
വഴിത്തിരിവ്
ഈ തിരഞ്ഞെടുപ്പ് വിജയിക്ക് ഒരു സാധാരണ തെരഞ്ഞെടുപ്പ് പരീക്ഷണമെന്നതിലുപരി, അദ്ദേഹത്തിന്റെ രാഷ്ട്രീയ ഭാവിയെ നിർണയിക്കുന്ന നിർണായക ഘട്ടമാണ്. തമിഴ്നാട് രാഷ്ട്രീയത്തിൽ അദ്ദേഹം നേരിട്ട് അധികാരം ലക്ഷ്യമിടുന്ന നേതാവായി ഉയരുമോ, അല്ലെങ്കിൽ സർക്കാർ രൂപീകരണത്തിൽ നിർണായക സ്വാധീനം ചെലുത്തുന്ന ‘കിങ് മേക്കർ ’ ആയി മാറുമോ എന്നതാണ് എല്ലാവരും ഉറ്റുനോക്കുന്നത്.
തെരഞ്ഞെടുപ്പ് ഫലം വരാന് മണിക്കൂറുകള് മാത്രം ബാക്കി നില്ക്കെ രാഷ്ട്രീയ നീക്കങ്ങള്ക്ക് കളം ഒരുക്കുകയാണ് വിജയും ടിവികെയും. ജയം നേടുന്ന സ്ഥാനാര്ഥികള്ക്കായി റിസോര്ട്ട് ഉള്പ്പെടെ ബുക്ക് ചെയ്ത് കാത്തിരിക്കുകയാണ് വിജയ്. വിജയിക്കുന്ന സ്ഥാനാര്ഥികളോട് മഹാബലി പുരത്തെ റിസോര്ട്ടില് എത്താനാണ് ടിവികെ നേതൃത്വം നിര്ദേശിച്ചിരിക്കുന്നത്. 100 ഓളം വരുന്ന സ്ഥാനാര്ഥികള്ക്ക് തങ്ങാന് അവശ്യമായ സൗകര്യങ്ങളോട് കുടിയുള്ള റിസോര്ട്ടാണ് മഹാബലി പുരത്തെ പൂഞ്ചേരിയില് തയ്യാറാക്കിയിരിക്കുന്നത്.
English Summary: Tamil superstar Vijay’s political debut through TVK has turned Tamil Nadu’s election into a high-stakes contest. As exit polls largely favour DMK, Vijay’s role remains uncertain but crucial. If no party secures a majority, he could emerge as a kingmaker, deciding the government. A strong performance, however, may push him toward power as a CM contender. The results will define whether Vijay becomes a decisive force or a ruling leader in Tamil Nadu politics.
