ചോർന്നൊലിക്കുന്ന മേൽക്കൂരകൾ, ഒഴിഞ്ഞ ക്ലാസ് മുറികൾ, സഹപാഠികളായി കന്നുകാലികൾ; രാജ്യം മുഴുവൻ സ്കൂളുകൾ തകർച്ചയിൽ, വേറിട്ട മാതൃകയായി കേരളം

രാജ്യത്തെ പല സംസ്ഥാനങ്ങളിലെയും സർക്കാർ സ്കൂളുകൾ അടിസ്ഥാന സൗകര്യങ്ങളില്ലാതെ അങ്ങേയറ്റം പരിതാപകരമായ സാഹചര്യങ്ങളിലാണ് ഇപ്പോഴും പ്രവർത്തിക്കുന്നത് എന്നതിന്റെ ഞെട്ടിക്കുന്ന നേർചിത്രങ്ങളാണ് ഇപ്പോൾ പുറത്തുവരുന്നത്. രാജ്യത്തെ പൊതുവിദ്യാഭ്യാസത്തിന്റെ യഥാർത്ഥ അവസ്ഥ അന്വേഷിച്ച് ടൈംസ് ഓഫ് ഇന്ത്യ തയ്യാറാക്കിയ പുതിയ ഗ്രൗണ്ട് റിപ്പോർട്ടിലാണ് ഈ ദയനീയ വിവരങ്ങൾ ഉള്ളത്. മതിയായ കെട്ടിടങ്ങളില്ല, അധ്യാപകരുടെ കുറവ്, അടിസ്ഥാന സൗകര്യങ്ങളുടെ അഭാവം എന്നിവ കാരണം രാജ്യത്തെ വലിയൊരു വിഭാഗം വിദ്യാർഥികൾക്കും ഇന്നും ദുരിതപൂർണ്ണമായ സാഹചര്യങ്ങളിലാണ് വിദ്യാഭ്യാസം ലഭിക്കുന്നത്.

കടലാസുകളിൽ മാത്രം ഒതുങ്ങുന്ന വികസന പദ്ധതികളും അടിസ്ഥാന സൗകര്യങ്ങളും പല സംസ്ഥാനങ്ങളിലെയും ഗ്രാമീണ മേഖലകളിൽ കുട്ടികൾക്ക് അപ്രാപ്യമാണ്. എന്നാൽ ഈ ദേശീയ പ്രതിസന്ധികൾക്കിടയിലും, അടിസ്ഥാന സൗകര്യങ്ങളിലും ഡിജിറ്റൽ വിദ്യാഭ്യാസത്തിലും വൻ മുന്നേറ്റം നടത്തിയ കേരളം എങ്ങനെ ഒരു മികച്ച മാതൃകയായി നിലകൊള്ളുന്നു എന്ന് ഈ റിപ്പോർട്ട് പ്രത്യേകം എടുത്തുകാണിക്കുന്നുണ്ട്.

പല സംസ്ഥാനങ്ങളിലും സ്കൂളുകൾ തൊഴുത്തുകൾക്കും താഴെ

ബിഹാറിലെ റോഹ്താസ് ജില്ലയിലെ ഒരു സർക്കാർ സ്കൂളിലെ കാഴ്ചകൾ രാജ്യത്തെ പൊതുവിദ്യാഭ്യാസത്തിന്റെ ശോചനീയാവസ്ഥയുടെ നേർചിത്രമാണ്. ഇവിടുത്തെ അപ്പർ പ്രൈമറി സ്കൂളിൽ ഏകദേശം ഇരുന്നൂറോളം വിദ്യാർഥികൾ പഠിക്കുന്നത് വെറുമൊരു മുറിയിലാണ്. സ്കൂളിന്റെ മറ്റ് രണ്ട് മുറികളിൽ പ്രദേശവാസികൾ കാലിത്തീറ്റയും പുല്ലുവെട്ടുന്ന യന്ത്രങ്ങളും മറ്റും അനധികൃതമായി സൂക്ഷിച്ചിരിക്കുകയാണ്. കന്നുകാലികളും വിദ്യാർഥികളും ഒരേ വളപ്പിലാണ് സമയം ചെലവഴിക്കുന്നത്. മഴക്കാലത്ത് കെട്ടിടം ചോർന്നൊലിക്കുന്നതിനാലും പരിസരം ചളിനിറയുന്നതിനാലും പലപ്പോഴും ഇവിടെ ക്ലാസുകൾ നിർത്തിവെക്കേണ്ടി വരുന്നു.

മധ്യപ്രദേശിലെ സ്ഥിതിയും വ്യത്യസ്തമല്ല. 'പിഎം ശ്രീ' പദ്ധതി പ്രകാരം ഉന്നത നിലവാരത്തിലേക്ക് ഉയർത്തിയ പല സ്കൂളുകളിലും കഴിഞ്ഞ ഒരു വർഷമായി പ്ലസ് വൺ, പ്ലസ് ടു ക്ലാസുകളിലേക്ക് അധ്യാപകരില്ല. കുട്ടികൾ സ്വന്തമായാണ് പലപ്പോഴും പഠിക്കുന്നത്. ഭോപ്പാലിൽ അത്യന്തം അപകടകരമായ നിലയിലുള്ള, എപ്പോൾ വേണമെങ്കിലും തകർന്നുവീഴാവുന്ന ഒരു മുറിയിൽ എഴുപതോളം കുട്ടികളാണ് ഒരു അധ്യാപികയ്ക്ക് കീഴിൽ പഠിക്കുന്നത്. ഛത്തീസ്ഗഡിലാകട്ടെ, ആയിരത്തിലധികം സർക്കാർ സ്കൂളുകളിൽ പെൺകുട്ടികൾക്ക് പ്രത്യേക ശൗചാലയങ്ങളില്ല എന്ന് കോടതികൾ തന്നെ ചൂണ്ടിക്കാണിച്ചിട്ടുണ്ട്. പലയിടത്തും സ്കൂൾ കെട്ടിടങ്ങൾ തകർന്നു വീഴാറായതിനാൽ വരാന്തകളിലും മറ്റുമാണ് ക്ലാസുകൾ നടക്കുന്നത്.

ചോർന്നൊലിക്കുന്ന കെട്ടിടങ്ങളും അധ്യാപകരില്ലാത്ത ക്ലാസുകളും

മഴക്കാലത്ത് ചോർന്നൊലിക്കുന്ന ക്ലാസ് മുറികൾക്കുള്ളിൽ ബക്കറ്റുകളും കുടകളുമായി ഇരിക്കേണ്ട ​ഗതികേടിലാണ് ഉത്തരാഖണ്ഡിലെ വിദ്യാർഥികൾ. വി​ദൂര മലയോര മേഖലകളിലെ സ്കൂളുകളിൽ പഠിപ്പിക്കാൻ അധ്യാപകർ തയ്യാറാകുന്നില്ല എന്നതും ആയിരക്കണക്കിന് സ്കൂളുകളിൽ പത്തോ അതിൽ താഴെയോ കുട്ടികൾ മാത്രമാണ് ഉള്ളതെന്നതും ഇവിടുത്തെ വലിയൊരു പ്രതിസന്ധിയാണ്. ഹരിയാന സർക്കാർ സ്മാർട്ട് ക്ലാസ്സ്റൂമുകളെക്കുറിച്ച് വാചാലരാകുമ്പോഴും, അവിടുത്തെ പല ഗ്രാമങ്ങളിലും കുട്ടികൾ ഇപ്പോഴും പഠിക്കുന്നത് കന്നുകാലി തൊഴുത്തുകളിലും തുറസ്സായ സ്ഥലങ്ങളിലുമാണ്. സംസ്ഥാനത്ത് പതിനയ്യായിരത്തോളം അധ്യാപക ഒഴിവുകളാണ് നികത്താനുള്ളത്.

പഞ്ചാബിൽ കഴിഞ്ഞ നാലര വർഷത്തിനിടെ സ്കൂളുകളുടെ അടിസ്ഥാന സൗകര്യങ്ങൾക്കായി 2,300 കോടി രൂപ ചെലവഴിച്ചിട്ടുണ്ടെങ്കിലും ആകെ അനുവദിക്കപ്പെട്ട തസ്തികകളിൽ നാലിലൊന്നും ഒഴി‍ഞ്ഞു കിടക്കുകയാണ്. വലിയ കെട്ടിടങ്ങളുണ്ടെങ്കിലും പഠിപ്പിക്കാൻ അധ്യാപകരില്ല എന്നതാണ് പഞ്ചാബ് നേരിടുന്ന പ്രശ്നം.

ഉത്തർ പ്രദേശിൽ ഓപ്പറേഷൻ കായകൽപ്പ് എന്ന പേരിൽ അടിസ്ഥാന സൗകര്യങ്ങൾ മെച്ചപ്പെടുത്താൻ പതിനൊന്നായിരം കോടി രൂപ ചെലവഴിക്കുകയും എല്ലാ സ്കൂളുകളിലും ശൗചാലയങ്ങൾ ഉൾപ്പെടെ നിർമ്മിക്കുകയും ചെയ്തുവെങ്കിലും, അവ വൃത്തിയാക്കാൻ ജീവനക്കാരില്ലാത്തത് വലിയൊരു വെല്ലുവിളിയാണ്. ലൈബ്രറികളോ ഡിജിറ്റൽ സംവിധാനങ്ങളോ അവിടെ എത്തിയിട്ടില്ല. ഗോവയിൽ അടിസ്ഥാന സൗകര്യങ്ങൾ ലഭ്യമാണെങ്കിലും കുട്ടികളുടെ എണ്ണം ഗണ്യമായി കുറയുന്നതുമൂലം ആകെയുള്ളതിൽ നാല്പത്തഞ്ചു ശതമാനത്തോളം സ്കൂളുകളും ഒരൊറ്റ അധ്യാപകൻ മാത്രം പഠിപ്പിക്കുന്ന നിലയിലേക്ക് മാറിയിട്ടുണ്ട്. രാജസ്ഥാനിലും സ്ഥിതി സമാനമാണ്. വാടക കെട്ടിടങ്ങളിലും ഷെഡുകളിലും മരച്ചുവട്ടിലുമിരുന്ന് പഠിക്കാൻ കുട്ടികൾ നിർബന്ധിതരാകുന്നു.

കേരളത്തിന്റെ തിളക്കമാർന്ന മാതൃക

മറ്റ് സംസ്ഥാനങ്ങളിൽ അടിസ്ഥാന സൗകര്യങ്ങളുടെയും അധ്യാപകരുടെയും അഭാവത്തിൽ നട്ടംതിരിയുമ്പോൾ, കേരളം പൊതുവിദ്യാഭ്യാസ രം​ഗത്ത് കൈവരിച്ച നേട്ടങ്ങൾ തികച്ചും വ്യത്യസ്തവും രാജ്യത്തിനാകെ മാതൃകാപരവുമാണെന്ന് ടൈംസ് ഓഫ് ഇന്ത്യയുടെ റിപ്പോർട്ട് പ്രത്യേകം എടുത്തു പറയുന്നു. വിദ്യാഭ്യാസത്തെ ഒരു സുപ്രധാന പൊതുനന്മയായി കണ്ടുകൊണ്ടുള്ള കേരളത്തിലെ സർക്കാരുകളുടെ നിരന്തരമായ ഇടപെടലുകളും നിക്ഷേപങ്ങളുമാണ് ഈ നേട്ടത്തിന് പിന്നിലെ പ്രധാന കാരണം.

2016നും 2021നും ഇടയിൽ നടപ്പിലാക്കിയ പൊതുവിദ്യാഭ്യാസ സംരക്ഷണ യജ്ഞം കേരളത്തിന്റെ സ്കൂൾ വിദ്യാഭ്യാസ മേഖലയിൽ വലിയൊരു മാറ്റമാണ് സൃഷ്ടിച്ചത്. അടിസ്ഥാന സൗകര്യ വികസനത്തിനായി ഈ കാലയളവിൽ 2,300 കോടിയിലധികം രൂപയാണ് സംസ്ഥാനം ചെലവഴിച്ചത്. ഇതിന്റെ ഫലമായി ഇന്ന് കേരളത്തിൽ 4,752 പൊതുവിദ്യാലയങ്ങളിലെ മുഴുവൻ ക്ലാസ്സ്മുറികളും ഹൈടെക് ആയി മാറിക്കഴിഞ്ഞു. അതായത് സംസ്ഥാനത്തൊട്ടാകെ 45,000-ത്തോളം ഹൈടെക് ക്ലാസ്സ്മുറികൾ വിദ്യാർഥികൾക്കായി സജ്ജമാക്കിയിട്ടുണ്ട്. ഇതിനുപുറമെ പതിനൊന്നായിരത്തിലധികം ഹൈടെക് ലാബുകളും സ്കൂളുകളിൽ പ്രവർത്തിക്കുന്നുണ്ട്.

ഡിജിറ്റൽ പഠനത്തിനായി ഉപകരണങ്ങൾ നൽകി എന്ന് മാത്രമല്ല, അവ കൃത്യമായി ഉപയോ​ഗിക്കുന്നതിന് കേരളം നൽകിയ ശ്രദ്ധയും റിപ്പോർട്ടിൽ പരാമർശിക്കുന്നു. സംസ്ഥാനത്തെ 'കൈറ്റ്' (KITE - Kerala Infrastructure and Technology for Education) എന്ന സർക്കാർ ഏജൻസിയാണ് ഈ സാങ്കേതിക മുന്നേറ്റങ്ങൾക്ക് ചുക്കാൻ പിടിക്കുന്നത്. ഡിജിറ്റൽ പാഠ്യഭാഗങ്ങൾ തയ്യാറാക്കുന്നതിനൊപ്പം ഒന്നര ലക്ഷത്തോളം അധ്യാപകർക്ക് ആധുനിക സാങ്കേതികവിദ്യകളിൽ മികച്ച പരിശീലനം നൽകാനും കൈറ്റിന് സാധിച്ചു.

ഏറ്റവും ശ്രദ്ധേയമായ മറ്റൊരു കാര്യം വിദ്യാർഥികളുടെ സുരക്ഷയുമായി ബന്ധപ്പെട്ട് കേരളം സ്വീകരിച്ചിട്ടുള്ള കർശന മാനദണ്ഡങ്ങളാണ്. മറ്റ് സംസ്ഥാനങ്ങളിൽ കെട്ടിടങ്ങൾ തകർന്നുവീഴാറായ നിലയിൽ ക്ലാസുകൾ തുടരുമ്പോൾ, കേരളത്തിൽ ഓരോ സ്കൂൾ കെട്ടിടവും സുരക്ഷിതമാണെന്നും കുട്ടികൾക്ക് പഠിക്കാൻ അനുയോജ്യമായ സൗകര്യങ്ങൾ ഉണ്ടെന്നും ഉറപ്പുവരുത്തുന്നതിനായി തദ്ദേശ സ്വയംഭരണ സ്ഥാപനങ്ങളിൽ നിന്നുള്ള ഫിറ്റ്നസ് സർട്ടിഫിക്കറ്റ് നിർബന്ധമാക്കിയിട്ടുണ്ട്.

ഇന്ത്യയിലെ മറ്റ് പല സംസ്ഥാനങ്ങളിലും സ്കൂളുകൾ എന്ന് പറയുന്നത് മേൽക്കൂരയില്ലാത്ത, അധ്യാപകരില്ലാത്ത, കന്നുകാലികൾക്കൊപ്പമിരുന്ന് പഠിക്കേണ്ടിവരുന്ന ഇടങ്ങളായി ചുരുങ്ങുമ്പോൾ അടിസ്ഥാന സൗകര്യങ്ങൾ, സാങ്കേതികവിദ്യ, അധ്യാപകരുടെ മികവ്, കുട്ടികളുടെ സുരക്ഷ എന്നീ കാര്യങ്ങളിൽ കൃത്യമായ ആസൂത്രണത്തോടെ കേരളം സൃഷ്ടിച്ചെടുത്ത മാതൃക രാജ്യത്തിനാകെ വലിയൊരു പാഠമാണെന്ന് ഈ റിപ്പോർട്ട് വ്യക്തമാക്കുന്നു.