യുദ്ധഭീതിയിലമർന്ന് പശ്ചിമേഷ്യ; ഇറാനുനേരെ വീണ്ടും വ്യോമാക്രമണം, നിഷേധിച്ച് അമേരിക്ക

ഗൾഫ് മേഖലയിൽ വീണ്ടും യുദ്ധഭീതി ഉയർത്തിക്കൊണ്ട് അമേരിക്കയും ഇറാനും തമ്മിലുള്ള സൈനിക സംഘർഷം കൂടുതൽ രൂക്ഷമാകുന്നു. മിഡിൽ ഈസ്റ്റിന്റെ വിവിധ ഭാഗങ്ങളിൽ ഇരു രാജ്യങ്ങളും പരസ്പരം വ്യോമാക്രമണങ്ങളും മിസൈൽ ആക്രമണങ്ങളും കടുപ്പിച്ചത് അടുത്തിടെ നിലവിൽ വന്ന വെടിനിർത്തൽ കരാറിനെ വലിയ പ്രതിസന്ധിയിലാക്കിയിരിക്കുകയാണ്.

കഴിഞ്ഞ ദിവസങ്ങളിലും ഇരുവിഭാഗവും പരസ്പരം ആക്രമണങ്ങൾ നടത്തിയിരുന്നെങ്കിലും, വ്യാഴാഴ്ച ഉണ്ടായ പോരാട്ടം മുൻ ദിവസങ്ങളേക്കാൾ വളരെ വലുതും മാരകവുമായിരുന്നുവെന്നാണ് റിപ്പോർട്ടുകൾ വ്യക്തമാക്കുന്നത്. ഇതോടെ മേഖലയിൽ നിലവിലുള്ള വെടിനിർത്തൽ കരാർ പൂർണ്ണമായും തകർച്ചയുടെ വക്കിലെത്തിയിരിക്കുകയാണ്. ഇറാന്റെ പ്രത്യാക്രമണത്തെത്തുടർന്ന് യുഎസ് നാവികസേനയുടെ അഞ്ചാം കപ്പൽപ്പടയുടെ ആസ്ഥാനമായ ബഹ്‌റൈനിൽ കുറഞ്ഞത് മൂന്ന് തവണയെങ്കിലും അപായ സൈറണുകൾ മുഴങ്ങി. ഇതിന് പുറമെ കുവൈറ്റ്, ഖത്തർ എന്നീ രാജ്യങ്ങളിലെ തന്ത്രപ്രധാന കേന്ദ്രങ്ങളെ ലക്ഷ്യമിട്ടും ഇറാന്റെ മിസൈൽ ആക്രമണങ്ങൾ ഉണ്ടായി. ഇറാനിലെ ഏക ആണവനിലയമായ ബുഷെഹറിന് (Bushehr) സമീപവും അമേരിക്ക ആക്രമണം നടത്തിയതായി ഇറാൻ ആരോപിച്ചു

എന്നാൽ, വ്യാഴാഴ്ച ഇറാനിൽ നടത്തിയ ആക്രമണങ്ങൾക്ക് പിന്നിൽ തങ്ങളല്ലെന്നാണ് ഒരു മുതിർന്ന യുഎസ് ഉദ്യോഗസ്ഥൻ അൽ ജസീറയോട് പ്രതികരിച്ചത്. ഇറാനുമായുള്ള സാങ്കേതിക ചർച്ചകൾ തുടരുകയാണെന്നും പ്രശ്നപരിഹാരത്തിന് വാഷിങ്ടൺ ഇപ്പോഴും പ്രതിജ്ഞാബദ്ധമാണെന്നും അദ്ദേഹം വ്യക്തമാക്കി. മേഖലയിൽ സമാധാനം പുനഃസ്ഥാപിക്കുന്നതിനായി വിവിധ രാജ്യങ്ങളുടെ മധ്യസ്ഥതയിൽ നടക്കുന്ന ചർച്ചകളാണ് അമേരിക്കയുടെ ഈ വിശദീകരണത്തിന് കാരണമെന്നാണ് റിപ്പോർട്ടുകൾ സൂചിപ്പിക്കുന്നത്. എന്നാൽ ഇറാന്റെ ആണവനിലയത്തിന് സമീപവും മറ്റ് പലയിടത്തും സ്ഫോടനങ്ങൾ നടന്നതായി ഇറാനിയൻ ഉദ്യോഗസ്ഥരും മാധ്യമങ്ങളും റിപ്പോർട്ട് ചെയ്തിട്ടുണ്ട്. നിലവിൽ ഒരു രാജ്യവും ഈ ആക്രമണങ്ങളുടെ ഉത്തരവാദിത്തം ഏറ്റെടുത്തിട്ടില്ല.

ഈ സാഹചര്യത്തിലും നയതന്ത്രപരമായ വഴികൾ തേടാൻ അമേരിക്ക ശ്രമിക്കുന്നുണ്ട്. സൈനിക നടപടികൾക്ക് പകരം നയതന്ത്ര ചർച്ചകൾക്ക് അവസരം നൽകുന്നതിനായി അമേരിക്ക തൽക്കാലത്തേക്ക് ആക്രമണങ്ങൾ നിർത്തിവെച്ചിരിക്കുകയാണ്. ഭാവിയിൽ തിരിച്ചടികൾ ആവശ്യമായി വന്നാൽ എന്ത് നടപടി സ്വീകരിക്കണമെന്നതിനെക്കുറിച്ചുള്ള പട്ടിക അമേരിക്ക തയ്യാറാക്കി വെച്ചിട്ടുണ്ട്. യുഎസ്എ സ് എബ്രഹാം ലിങ്കൺ വിമാനവാഹിനിക്കപ്പലിലെ സൈനികരെ സജ്ജമാക്കി നിർത്തുന്നതിലൂടെ ഏത് അടിയന്തര സാഹചര്യത്തെയും നേരിടാൻ തയ്യാറാണെന്ന സന്ദേശമാണ് അമേരിക്ക നൽകുന്നത്. അതേസമയം, ഇറാനിലെ ആണവ വിഷയങ്ങളിലുള്ള സാങ്കേതിക ചർച്ചകൾ തുടരാൻ അമേരിക്ക തയ്യാറായത് പ്രശ്നപരിഹാരത്തിനായുള്ള സജീവമായ നയതന്ത്ര ശ്രമങ്ങളുടെ ഭാഗമാണ്.

ഇരുരാജ്യങ്ങളെയും ചർച്ചാമേശയിലേക്ക് കൊണ്ടുവരാൻ പാകിസ്ഥാനും ഖത്തറും തീവ്രശ്രമങ്ങൾ നടത്തുന്നുണ്ട്. ആക്രമണങ്ങളും പരസ്പര ആരോപണങ്ങളും തുടരുമ്പോഴും നയതന്ത്ര ഇടപെടലുകൾ വഴി ഒരു പരിഹാരം കണ്ടെത്താനാണ് അന്താരാഷ്ട്ര തലത്തിൽ ശ്രമങ്ങൾ നടക്കുന്നത്. എന്നാൽ നിലവിലെ സൈനിക നീക്കങ്ങളും പ്രത്യാക്രമണങ്ങളും മേഖലയെ വീണ്ടും ഒരു യുദ്ധഭീതിയിലേക്ക് തള്ളിയിട്ടിരിക്കുകയാണ്.

യുദ്ധം അവസാനിപ്പിക്കാനും ഹോർമുസ് കടലിടുക്കിലൂടെയുള്ള കപ്പൽ ഗതാഗതം പുനഃസ്ഥാപിക്കാനുമായി അമേരിക്കയും ഇറാനും തമ്മിൽ ധാരണാപത്രം ഒപ്പുവെച്ച് മൂന്നാഴ്ച പിന്നിടുമ്പോഴാണ് ഈ നിർണായക ജലപാത വീണ്ടും യുദ്ധഭീതിയിലായിരിക്കുന്നത്. തങ്ങളുടെ അനുമതിയില്ലാതെ കടന്നുപോകാൻ ശ്രമിച്ചുവെന്ന് ആരോപിച്ച് കഴിഞ്ഞ ദിവസങ്ങളിൽ മൂന്ന് വാണിജ്യ കപ്പലുകൾക്ക് നേരെയാണ് ഹോർമുസ് കടലിടുക്കിൽ ആക്രമണമുണ്ടായത്.

ഇതിന് മറുപടിയായി ഇറാനിലെ തീരദേശ നഗരങ്ങളിലും വ്യാഴാഴ്ച രാവിലെ തലസ്ഥാനമായ ടെഹ്‌റാനിലും അമേരിക്ക കനത്ത വ്യോമാക്രമണം നടത്തി. അമേരിക്കൻ ആക്രമണങ്ങൾക്ക് പ്രത്യാക്രമണമായി ഇറാൻ വിവിധ ഗൾഫ് രാജ്യങ്ങളിലേക്ക് മിസൈലുകളും ഡ്രോണുകളും തൊടുത്തുവിടുകയും ചെയ്തു. ഈ സംഘർഷ പരമ്പരകൾക്കിടെയാണ് വെള്ളിയാഴ്ച രാജ്യത്ത് പുതിയ ആക്രമണങ്ങൾ നടന്നതായി ഇറാൻ ഉദ്യോഗസ്ഥർ സ്ഥിരീകരിച്ചത്.

ഇറാനുമായി നിലനിൽക്കുന്ന സൈനിക സംഘർഷത്തിൽ യുഎസ് പ്രസിഡന്റ് ഡോണൾഡ് ട്രംപിനെതിരെ കടുത്ത വിമർശനവുമായി പ്രമുഖ ഡെമോക്രാറ്റിക് കോൺഗ്രസ് അംഗം ജിമ്മി പനേറ്റ രംഗത്തെത്തി. ട്രംപ് ഭരണകൂടത്തിന്റെ നടപടികൾ നയതന്ത്രത്തിന്റെയും തന്ത്രപരമായ ആസൂത്രണത്തിന്റെയും സമ്പൂർണ്ണ പരാജയമാണ് കാണിക്കുന്നതെന്ന് അദ്ദേഹം മുന്നറിയിപ്പ് നൽകി. ഒബാമ ഭരണകൂടത്തിൽ പ്രതിരോധ സെക്രട്ടറിയായും സിഐഎ ഡയറക്ടറായും സേവനമനുഷ്ഠിച്ച ലിയോൺ പനേറ്റയുടെ മകനാണ് ജിമ്മി പനേറ്റ.

വിഷയത്തിൽ പ്രസിഡന്റ് ട്രംപ് പറയുന്ന വാക്കുകളെ ആശ്രയിക്കാൻ കഴിയില്ലെന്ന് ജിമ്മി പനേറ്റ എക്സിൽ കുറിച്ചു. അമേരിക്ക നടത്തിയ പുതിയ വ്യോമാക്രമണങ്ങളും ഇറാന്റെ ഡ്രോൺ പ്രത്യാക്രമണങ്ങളും പരിശോധിച്ചാൽ, നിലവിലുള്ള സമാധാന ചർച്ചകൾ പരാജയപ്പെട്ടുവെന്നും വെടിനിർത്തൽ കരാർ ഫലപ്രദമല്ലെന്നും വ്യക്തമാകുമെന്ന് അദ്ദേഹം ചൂണ്ടിക്കാട്ടി.

"വ്യക്തമായ തന്ത്രമോ, കോൺഗ്രസിന്റെ അംഗീകാരമോ, അമേരിക്കൻ പൊതുജനങ്ങളുടെ പിന്തുണയോ ഇല്ലാതെ യുദ്ധത്തിലേക്ക് പ്രവേശിച്ചതിന്റെ തുടർച്ചയായ ആഘാതമാണ് ഇപ്പോൾ രാജ്യം നേരിടുന്ന ഈ പ്രതിസന്ധി." — ജിമ്മി പനേറ്റ പറഞ്ഞു.

അതേസമയം, ഗൾഫ് രാജ്യങ്ങളായ ജോർദാൻ, കുവൈറ്റ്, ബഹ്‌റൈൻ എന്നിവിടങ്ങൾക്ക് നേരെ കഴിഞ്ഞ ദിവസങ്ങളിൽ ഇറാൻ നടത്തിയ മിസൈൽ-ഡ്രോൺ ആക്രമണങ്ങളെ പലസ്തീൻ അതോറിറ്റി പ്രസിഡന്റ് മഹ്മൂദ് അബ്ബാസിന്റെ ഓഫീസ് ശക്തമായി അപലപിച്ചു. പലസ്തീൻ ഔദ്യോഗിക വാർത്താ ഏജൻസിയായ 'വഫ' (Wafa) ആണ് ഇക്കാര്യം റിപ്പോർട്ട് ചെയ്തത്. ആക്രമണത്തിന് ഇരയായ ജോർദാൻ, കുവൈറ്റ്, ബഹ്‌റൈൻ എന്നീ രാജ്യങ്ങളോട് പലസ്തീൻ പൂർണ്ണ ഐക്യദാർഢ്യം പ്രഖ്യാപിച്ചു. തങ്ങളുടെ പരമാധികാരവും സുരക്ഷയും സംരക്ഷിക്കുന്നതിനായി ഈ രാജ്യങ്ങൾ കൈക്കൊള്ളുന്ന ഏത് നടപടികൾക്കും പലസ്തീന്റെ പൂർണ്ണ പിന്തുണയുണ്ടാകുമെന്നും മഹ്മൂദ് അബ്ബാസിന്റെ ഓഫീസ് വ്യക്തമാക്കി.

കഴിഞ്ഞ ചൊവ്വ, ബുധൻ ദിവസങ്ങളിൽ അമേരിക്ക തങ്ങളുടെ നഗരങ്ങളിൽ ബോംബാക്രമണം നടത്തിയതിന് പ്രതികാരമായാണ് ബഹ്‌റൈൻ, കുവൈറ്റ്, ഖത്തർ എന്നിവിടങ്ങളിലെ യു.എസ് സൈനിക താവളങ്ങളും തന്ത്രപ്രധാന കേന്ദ്രങ്ങളും ആക്രമിച്ചതെന്നാണ് ഇറാന്റെ വാദം. എന്നാൽ അറബ് രാജ്യങ്ങൾക്ക് നേരെ ഇറാൻ നടത്തുന്ന ഇത്തരം സൈനിക നീക്കങ്ങൾ മേഖലയിലെ സമാധാന അന്തരീക്ഷത്തെ കൂടുതൽ തകർക്കുമെന്നാണ് പലസ്തീൻ ഉൾപ്പെടെയുള്ള രാജ്യങ്ങളുടെ നിലപാട്.

അതിനിടെ, അമേരിക്കയും ഇറാനും തമ്മിലുള്ള സൈനിക സംഘർഷം വീണ്ടും യുദ്ധത്തിലേക്ക് നീങ്ങുന്നതിനിടയിലും യുഎസ് ഓഹരി വിപണിയിൽ വൻ മുന്നേറ്റമാണ് കാഴ്ചവയ്ക്കുന്നത്. പ്രമുഖ സെമികണ്ടക്ടർ നിർമാണ കമ്പനിയായ 'മൈക്രോൺ ടെക്നോളജി'യുടെ മികച്ച പ്രകടനത്തെത്തുടർന്ന് ചിപ്പ് നിർമ്മാണ കമ്പനികളുടെ ഓഹരി വില ഉയർന്നതാണ് വിപണിക്ക് തുണയായത്. വ്യാഴാഴ്ച യുഎസ് ഓഹരി സൂചികയായ നസ്ദാക് (NASDAQ) ഉയർന്ന നിരക്കിലാണ് വ്യാപാരം അവസാനിപ്പിച്ചതെന്ന് വാർത്താ ഏജൻസിയായ റോയിട്ടേഴ്സ് (Reuters) റിപ്പോർട്ട് ചെയ്തു.